Joniston Bangkuai
KOTA KINABALU: Ponuridongan Puruankuasa’ Koburuon Desa Madani (JKDM) id Sabah i tinimpuunan do Komontirian Koburuon Labus Kakadayan om Watas Pisompuruan i binuruan di Kumoduo Luguan Montiri, Datuk Seri Zahid Hamidi kopokito pogoyuon amu’ momoduli’ tonggungan Puruankuasa’ Koburuon om Koumoligan Kampung (JKKK) id siriba’ dolundungan Koporintaan Sabah.
“Nunu di kosudongan ponuridongan JKDM? Haro toi kogunoon montok dilo’ dadamot dati’ do haro no JKKK id tikid kampung?” ka di Luguan Kopointalangan Gabungan Rakyat Sabah (GRS) Datuk Joniston Bangkuai id kointalangan di tadau baino’.
Minoboros isio, laang miagal dilo’ nopo nga’ kaagal do sumaap sunduan konsep Madani i pinointutunan do Koporintaan Pisompuruan i poposotol kumaa kopoingkawasan pihunungan, pisokodungan om pisompuruan id nayatan mogigiyon.
“Zahid i po nogi’ Presiden UMNO kiguno popointalang kootusan dilo’ kumaa mogigiyon Sabah i mongomi kootuson karalano’ “mongurias om momorinta’” i okito sabaagi laang monginggirot UMNO id Sabah.
“Gisom noilaan ku, aiso’ JKDM id Sarawak i aiso’ UMNO,” ka di Joniston i po nogi’ Luguan Kopointalangan Parti Bersatu Sabah (PBS).
Sundung aiso’ kinapahabaran pinotomod, minoboros isio, surat karait ponuridongan JKDM id pipiro koiyonon Lintuhun Undangan Pogun i kaka om sinoinan di Zahir nakatayad doid media sosial.
