Dr. Joachim (koduo, gibang) pinapathaak tandamato kuminaa di Tiong om poingintong ii Toisin (gibang), Stevie (koduo, wanan) om nogi’ i Julie.
KOTA KINABALU: Kaamatan nopo nga’ impohon montok popointutun pisompuruan sosial om ponokosunsuyon pihunungan id pialatan mogigiyon tinaru di sopisuai.
Kumoduo Boyoon Montiri II Sabah, Datuk Seri Dr. Joachim Gunsalam minoboros, Ramai Kaamatan i ramaion tikid otun nopo nga’ poimpahan montok kopongunsikohan kumaa Tuhan mantad nomot di osonong om ogumu’ miampai angkab toun obontol lobi po daa kosonong.
“Nga’ id timpu kaawagu diti hinombo do amu’ tokou nodii mananom parai ponokokaraja’ kopio montok kosusukupon koposion tokou, mamaramai tokou do ramai Kaamatan diti montok manahak kounsikohan kumaa Tuhan mantad karaja’ tokou i potuu pakakaraja’ porinta’, swasta toi ko’ sabaagi mongindapu’ montok mogihum nindopuan montok kosusukupon koposion di lobi ksoonong om osimbayan montok dati’ om paganakan koupusan.
Isio po nogi’ Kumoduo Presiden Koisaan Koubasanan KadazanDusun (KDCA) ounsikou di kinorikotan mogigiyon Sabah id pososorili’ Klang Valley i kapaampai do Kadazan Dusun Murut om Rungus (KDMR) nogi’ tongo’ tombului nangaalap id Ramai Pinomupusan Ababayan Limunduk Kapamaramaian Lamai Kaamatan Nayatan KDCA Klang Valley (KDCA KV) Ko-28 id Grand Dorsett Subang, Subang Jaya, Selangor di kosodop.
“Soira’ dati’ papaharo ramai Kaamatan, suai ko’ mongunsikou kumaa Tuhan, momolohou tokou nogi’ di tongo’ koobpinoian di osomok om osodu’ om tambalut do munsikou miampai dati’, om nosili dii i roitan tokou do ‘moginakan’”. Om hiti tokou no do popokito kinoubasanan otkou di olumis poposili toi popokiro kointutunan tokou sabaagi iso’ tinaru di sopisuai ko’ mantad tinaru di suai.
Ka disio, id timpu kaawagu diti, pasanganu tokou do mogisuusai koubasanan, di tongolumis i kopokito do isai tokou.
“Pasanganu tokou mogisuaian sayau, kakamot tuunion, sugandoi, sokot koubasanan i aanu pokitanan piagalan id pogialatan tongo’ tinaru id sabah,” ka disio i minoboros kopokito nogi ilo’ do kopogiagalan om pogisusuaian id nayatan orukut tinaru i haro id Sabah.
“Kaanu tokou nogi’ popokiro kinomiloon nokoiyonon, tadat kinoubasanan, maya sayau, tuunion, taakanon, boros, karalano’ poinpasi, sokot koubasanan om sopiagal dilo’. Kopogisusuaian koubasanan om tungkusan nogi’ piuludan mogisuai tinaru om sub-tinaru id sabah nokoposili ‘Pogun Sahau Tongus’ sabaagi pomogunan di olumis montok tikid mogigiyon nogi’ tombului i korikot id Sabah.
“Kanou tokou popokito koubasanan di mogipapantang om orohian oulud miampai koinsanai tinaru di haro id Malaysia. Kalansanan ababayan miagal diti koowit do koburuon, kasasanangan om kotoronongon kumaa oinsanan i mamaramai dilo’.
“Kanou tokou nogi’ toinsanan poposindak om popoinsingubas sunduan pisompuruan id nayatan koinsanai mogigiyon Malaysia montok monginggirot sunduan piombolutan om pogisokodungan sompipi’ dati’,” ka disio.
Dr. Joachim ontok pinapatahak do boboroson disio.
Isio i kinoruhang di sawo dau Datin Seri Linda Ewit minoboros, limunduk pamaramaian Kaamatan nopo nga’ pialaan Unduk Ngadau, hinombo do tongo’ monongkiala’ di bobos osonong id kotigulaion diolo’ id toguang juri abaal gaa’an sabaagi Unduk Ngadau.
Ka disio, nung intangan ilo’ do sabaagi pialaan kinolumison nopo nga’ amu’ orotian ngaawi’ i komoyon.
Tongo’ tutumanud ka disio, om lobi-lobi no kopio di kalantoi apatut do mobit di Huminodun, i luminubuk montok mamasi di ongolouson miampai suminili do tanom i nosili taakanon tokou gisom do babaino’ diti.
Sumandak i aga’an do Unduk Ngadau apatut kopio momuginawo di kinosunduon om sunduan di Huminodun om popokito dilo’ id koposion do tadau-adau mooi do kosili turianan om pantangon do mogigiyon, ka disio.
Minanangkabayahan kumaa KDCA Klang Valley i pinopoindalan kaparagatan CEPA (Communication, Education and Public Awareness) maya’ mogisusuai kaparagatan pibabarasan id sinusulap pokikitanan om piilangan toilaan i miampai amu’ mitilombus karait tongo’ haal ngaawi’ kohimaganan taakanon om nogi’ monokodung Sondikoton Koburuon Po’ompus (SDG), Dr. Joachim po nogi’ Montiri Koporintaan Koiyonon om Pomuwalaian Sabah minoboros, koinsanai diti nopo montok mongingkawas piromutan piobpinoian id nayatan susumikul Sabah i minsingilo doid pososorili’ Klang Valley.
Dr. Joachim (tanga’) suminasi’ di Toisin (gibang) pinapatahak tandamato kuminaa di Linda id ramai dilo’.
Minonongkounsikou nogi’ isio kumaa di Senator Datuk Noraini Idris i pinopoimagon pinongukaban kapamaramaian Ramai Kaamatan nayatan Klang Valley i pinopokito koyuyuon kohimogonan takanon maya’ ponginsomokan agropertanian, pomogompian tungkusan, seni om koubasanan, kopongindopuan, agro ponombuluyan; kopogorisan sukod wagu om moningkanan kumaa komponen SDG i monokodung inggismana koporintaan id konsep katatapon.
Lumansan isio om monokodung mooi do waya’ pisokodungan id pogialatan oinsanan boogian i nakaampai, nogi’ KDCA Klang Valley do aanu tilombuson miampai mogisusuai po kaparagatan miagal diti do timpu dumontol.
Nokotindapou nogi’ i Montiri Ponombuluyan Malaysia, Dato’ Sri Tiong Ken Sing; Puru Dewan Negara, Senator Datuk Noraini Idris; Monontuduk KDCA Klang Valley, Datuk Toisin Gantor; Ponorikohon KDCA Klang Valley, Julie Jidwin; Ponorikohon Puruankuasa’ Manganganjur, Stevie Sebol; Luguan Eksekutif, Agape Superior Living Sdn. Bhd, po nogi’ tambalut ponokiuhup Agayo, Dato’ Sri Dr. How Kok Choong; Progesor Datuk TS. Dr. Ramzah Dambul; Minonuridong om Monontuduk Titijaya Land Sdn. Bhd, Tan Sri Lim Soon Peng; Monontuduk Koisaan Koubasanan om Tungkusan Malaysia Borneo (MANTRA), Azizah Abas nogi’ tongo’ upisor Komontirian Ponombuluyan, Seni om Koubasanan (MOTAC).
