Dr. Joachim (gibang) monongkirumo dilo sitaf KKTP i nokotindapou id Ramai Tadau Raya Aidilfitri om Ramai Kaamatan 2024 nayatan KKTP i pinaanjur id lobi Wisma Innoprise.
KOTA KINABALU: Montiri Koporintaan Koiyonon om Pomuwalaian (KKTP), Datuk Seri Dr. Joachim Gunsalam manu piuhupan ogirot nogi’ piromutan di osonong id pialatan Komontirian om tongo’ kotinanan ngaawi’ id siriba’ dau om bohogian kikuasa’ nokoiyonon (PBT) oinggirotan montok monigampot sondikoton toinsanan.
Minoboros isio, karaja’ tinimungan lobi kapanahak koundaran kumaa koponigompotan sondikoton di miagal.
“Komontirian kiharo skop karaja’ om tonggungan di agayo kopio. Mantad koponguludan pomuwalaian, kopomozoonan, ponuridongan tongo’ kakadayan wagu, kobolingkahangan Ababayan Pomuwalaian Mogigiyon (PPR), kobolingkahangan setinggan kumaa tonggungan hal ngaawi’ mamasok pogun gisom no kumaa kopoindalanan koporintaan nokoiyonon.
“Poingkuro po, mantad nodi piromutan om pihunungan pialatan Komontirian om tongo’ kotinanan nogi’ PBT, oinsanan hal diti ninggisaman toinsanan montok maganu kointalangan nogi’ minggisom kumaa panalasaian toisoiso’ kobolingkahangan.
“Tonggungan oinsanan di poinhompit, kaampai id pitimungan Lintuhun Undangan Pogun (DUN) di kaawagu diti nokopokito do pointotopot tokou id kopoindalanan tonggungan di pinatahakan. Bayahan kumaa oinsanan di nokogompit,” ka di Dr. Joachim i po nogi’ Kumoduo Boyoon Montiri II id Ramai Tadau Raya Aidilfitri om Ramai Kaamatan 2024 nayatan KKTP i pinoindalan doid lobi Wisma Innoprise, do hiti, di baino’.
Dr. Joachim pinopoindalan koponinsiban kek miampai tombului tapantang di nokotindapou.
Minanangkabayahan kumaa puruankuasa manganganjur kapamaramaian Tadau Raya Aidilfitri om Ramai Kaampatan nayatan KKTP dilo’, Dr. Joachim minoboros, ramai dilo’ kapanahak kosiwatan kumaa koinsanai puru Komontirian, kotinanan om PBT do popigirot po do piombolutan om koposuni sunduan pagakanan.
“Kosiwatan diti manahak dati’ kosiwatan monginggirot pisompuruan id nayatan dati’ toinsanan om koposuni sunduan paganakan id pialatan dati’.
“Otopot nopo, ramai diti nakaanu pinoposompuru kopogisusuaian ugama’ om koubasanan. Kopongonjuran ‘dwi’ karamaian diti kopokito piuludan id pogialatan orukut tinaru om nantadon,” ka disio.
Dr. Joachim (kolimo, wanan) pinapatahak setifikit kinotonudan Pialaan Sinusulap Taakanon kuminaa di Upisor Eksekutif Tuaran, Jamlin Ladin i po noig’ nosili bontugan montok pialaan dilo’.
Turu’ PBT ilo’ nopo nga’ Kounsol Watas Penampang, Sipitang, Tuaran, Papar, Beaufort, Kuala Penyu om Kounsol Watas Putatan nakaampai id kinoposodiaan sinusulap pangangakanan id ramai dilo’, suai ko’ Kotinanan Koburuon Pomuwalaian om Kakadayan (LPPB), Koupisan Pamalanan Kakadayan om Watas (JPBW) om Koupisan Haal Ngaawi’ Tanak Mamasok Pogun Sabah JHEANS) nogi’ Komontirian.
Nokotindapo nogi’ i sawo di Dr. Joachim, Datin Seri Linda Ewit; Monguhup Montiri I, Datuk Isnin Aliasnih; Monguhup Montiri II miampai sawo, Datuk Mohamad Hamsan Awang Supain om Datin Kalsom Abd Aziz; Monunurat Pointatap Komontirian, Datuk Dr. Jamili Nais; Kumoduo Monunurat Pointatap Komontirian II po nogi’ Ponorikohon Manganganjur, Faridah Giau; tongo’ Potunud Kotinanan om sitaf Komontirian.