KOTA KINABALU: Koporintaan pogun pointootopot monoibau kaantakan komosikinan kosuul no moningkod ‘miskin tegar’ (mosikin nakadala’) id Sabah.
Id timpu diti, koporintaan pogun miampai sokodung koinsanai upis watas, bohogian kikuasa’ nokoiyonon om nogi’ tongo’ komponi poinggompit koporintaan om papamanaua pomorunan masaan popoindalan ababayan momupus komosikinan nakadala’.
Molohingon Pogun Sabah, Tun Juhar Mahiruddin minoboros, gisom wulan Kosiam 2023, ginumu’ luguan suang walai (KIR) mosikin nakadala’ id sistem e-Kasih nopo soginumu’ 22,510 tulun.
Nga’, gisom di tulan Kotolu katatalib, pinoruput soginumu’ 13,179 KIR mosikin nakadala’ id Sabah. Kopokito ilo’ kinoinsiribaon soginumu’ 42 pihatus waya’ mantad kinopomolihungan kointalangan KIR mosikin nakadala’.
“Kohondot dilo’, koporintaan pogun popoindalan ababayan koponoibahan komosikinan nakadala’ maya’ fasa ilo’ nopo nga’ kaparagatan timpu oniba’, gonsuhatan om anaru kopuli limo impohon montok tuduan kopipadanan ponguhupan toi ‘intervensi’ di kosudong kumaa mosikin nakadala’ ilo’ nopo nga’ pakarjaan, kopongindopuan, pomuwalaian, balajaran om kotundunan.
“Maya’ karalano’ timpu oniba’ i moningkanan doid kapanahakan kosiwatan pakarajaan, inggisaman miagal MySMJ: Profiling, MySMJ Kerja: PBT, MySMJ Kerja”: DO, MySMJ Kerja: GLC om MySMJ Kerja: Industri pinoindalan kituduan montok monguhup mogigiyon id nayatan mosikin nakadala’ montok kaanu nindopuan pointatap toi karamit koinsawaton nindopuan maya’ koposodiaan kosiwatan pakarajaan.
“Suai ko ilo’, mogisusuai inggisaman/ponguhupan kumaa KIR toi puru suang walai mosikin nakadala’ nga’ nointutunan maya’ kinopoindalanan ‘profiling’ montok kopipadanan tumanud kosudongan,” ka disio id boboroson impuunon koporintaan kopihondot Istiadat Pongukaban penggal kolimo Lintuhun Undangan Pogun (DUN) Sabah di tadau baino’.
Daamot dilo’, minoboros i Juhar, koporintaan pogun nga’ masaan nogi’ papapanau kopoindalanan Ababayan Rumah Mesra Sabah Maju Jaya montok papatantu’ mogigiyon id labus kakadyaan kosikap kaanu iyonon di osimbayan om oumolig hinombo do miampai mitilombus kouhup mongingkawas rontob koposion tinimungan diti.
Do toun diti, pinatantu’ soginumu’ 20 unit walai maan waalo’ id tikid koiyonon DUN.
Id timpu miagal, soginumu’ limo projik pomuwalaian id siriba’ ababayan Pomuwalaian Mampu Milik maan poindalano’ do koporintaan pogun kapaampai 644 unit walai id Kota Kinabalu om Beaufort.
Id siriba’ Projik Perumahan Awam nopo, soginumu’ apat tinan projik maan poindalano’ toun diti kopohompit 175 unit walai teres id watas okoor’ Sukau, Beluran, Pitas om watas Melalap nogi’ koponuridongan 50 unit walai miapid id tolu fasa Projik Perumahan Awam id watas okoro’ Kemabong
