Tun Juhar miampai di Hajiji, Kadzim, Sahelmey id Ramai Walai Poingukab Aidilfitri Koporintaan Pogun Toun 2024M/1445H id Longkod Konvensyen Sompomogunan Sabah (SICC), Kota Kinabalu, di tadau baino’.
KOTA KINABALU: Lobi 20,000 tombului nokotindapou minamaramai Ramai Walai Poingukab Aidilfitri Koporintaan Pogun Toun 2024M/1445H id Longkod Konvensyen Sompomogunan Sabah (SICC), do hiti, di tadau baino’.
Ramai toun-toun dilo’ rinamai nogi’ miampai kinorikotan di Molohingon Pogun, Tun Juhar Haji Mahuruddin om sawo, Toh Puan Norlidah R.M Jasni.
Boyoon Montiri, Datuk Seri Haji Hajiji Haji Noor om sawo, Datin Seri Hajah Juliah Salag ontok nokorikot id SICC di jam ko 10.15 kosuabon, pinapatahak nogi’ do toluod tusin raya kuminaa di 100 tulun asnaf.
Talib dilo’ tinanud isio di Kumoduo Boyoon Montiri i po nogi’ Ponorikohon Puruankuasa Induk Walai Poingukab Tadau Raya Aidilfitri Koporintaan Pogun, Datuk Ir. Shahelmey Yahya miampai Nuludan Montiri pogun pinoposiwat timpu ruminuba’ om monongkirumo miampai di mogisusuai nayatan mogigiyon i nokotindapou id walai poingukab dilo’.
Nokotindapou nogi’ i Speaker Lintuhun Undangan Pogun (DUN) Sabah, Datuk Seri Kadzim M. Yahya, Montiri Pidagangan Suang Pogun om Kos Pamaamasi, Datuk Armizan Mohd. Ali om ongkingaangaran di suai.
Tombului di nokotindapou nga’ linihis nogi’ di kinaparangahan sinding Tadau Raya mantad artis nokoiyonon Sabah.
