Hajiji ruminamit tandamato mantad di Nancy.
KOTA KINABALU: Boyoon Montiri, Datuk Seri Haji Hajiji Haji Noor minamaramit kinotombuluyan apantang mantad di Montiri Koburuon Koonduan, Paganakan om Mogigiyon, Datuk Seri Hajah Nancy Shukri id upis disio doid Menara Kinabalu, do hiti , di tadau baino’.
Nancy pinopoilo di Hajiji di tongo’ kaparagatang ngaawi’ montok papagaras koonduan kosuul no id Sabah i nokoindalan do koupisan om kotinanan siriba’ komontirian disio id pogun diti.
Ka disio, toun di nakatalib, Komontirian Koburuon Koonduan, Paganakan om Mogigiyon Malaysia (KWPKM) maya’ Yayasan Kotundunan Negara (YKN) pinopoindalan Ababayan ‘Wanita Bangkit’ i nokopohompit somok 2,000 koonduan Sabah om Ababayan Advokasi Akta Antigangguan Seksual id siriba’ Koupisan Koburuon Koonduan (JPW) i nakapaampai lobi 1,000 koonduan id pogun diti.
Montok toun diti, orohian isio popoinggayo surupukaraja’ KPWKM id Sabah lolobi no montok papagaras koonduan.
Tinanud isio di Luguan Potunud JPW Malaysia, Dr. Wan Nur Ibtisam Wan Ismail om Luguan Upisor Eksekutif YKN Malaysia, Nordina Haron.
I Nancy id Sabah montok tumindapou pipiro ababayan pinotomod doid Lahad Datu.
