Dr. Joachim (tanga’) guminambar pongingitanan miampai tombului tapantang om tangaanak Asnaf.
KOTA KINABALU: Kumoduo Boyoon Montiri II, Datuk Seri Dr. Joachim Gunsalam pinoposorou oinsanan luguan koupisan koporintaan mooi do amu’ kumaraja’ miampai ‘silo’ (kumaraja’ nopo id suang tinimungan sondiri) montok koundaran pogun diti.
“Misokodung miampai komponi poinggompit koporintaan miagal do Invest Sabah Berhad montok mogowit koburuon agayo kumaa Sabah.
“Kada’ karaja’ tumanud kalano’ laid. Miampai tokou poingkaraja’ do otitimung montok monoibau tomporuruol dilo’, kanou tokou no toinsanan mogowit koburuon kumaa pogun diti kopiongoi di sondikoton Sabah Maju Jaya,” ka disio id ramai mongukab puasa Invest Sabah Berhad doid Le Meridien Kota Kinabalu, do hiti di konihab.
Dr. Joachim pinapatahak toluod om poingintong i Ponorikohon Invest Sabah Berhad Tan Sri Anifah (koduo, gibang) om Montiri Koburuon Pomorunan om Mongindapu’, Phoong (koduo, wanan).
Dr. Joachim po nogi’ Montiri Koporintaan Koiyonon om Pomuwalaian Pogun dilo’ minongunsub mogigiyon montok tumilombus popoingginawo sunduan kinasalangon om tumilombus komgot miampai angkab, ninggisaman om pisompuruan.
“Kinasangalon nopo nga’ kogoosan montok monoguang koinggoritan miampai lisi om inggisaman. Ilo no koyuon sinonong i pointanom id mogigiyhon tokou, om ilo’ no i kapatantu’ dati’ doid timpu kaantaban.
“Katalib minonoguang tomporuruol Covid-19 om mogisusuai kaantaban dilo’, nokokito tokou do ginoris kinasangalon di agao kopio mantad sunduan tulun. Mimpuun di pakakaraja’ dingguluonon kumaa mogigiyon tomod, tikid mantad dati’ nakapapanau tonggungan id kinopoinoibahan kaantaban om nokomogot kumaa sogulu miampai kinasalangon om ginoris.
“Miampai mongukab puasa’ sodop diti, kanou tokou no maganu pomusarahan mantad kinasangalon mogigiyon dati’ om tumopot kawagu montok monuridong timpu dumontol di lobi kosonong montok Sabah. Kanou tokou no momoguno kuasa’ pisompuruan, polisihan om pisompuruan montok monoibau nunu nopo kaantaban di rumikot,” ka disio.
Dr. Joachim minonongkounsikou nogi’ kumaa di Datuk Seri Anifah Aman, Ponorikohon Invest Sabah Berhad, mantad kopomuruanan om tonggungan ouli’ diti kumaa koburuon Sabah.
“Id siriba’ pomuruanan nu, otumbayaan oku Invest Sabah Berhad koburu’, om pogun tokou nga’ kokito kosunion om komogoton di amu’ insan kaantakan pogulu diti.
Tan Sri Anifah nakaramit sokodung poinponu’ Koporintaan Pogun.
“Mantad nawawayaan agayo nu lolobi id minomuruan Komontirian Labus Pogun, otumbayaan oku piromutan Tan Sri Anifah kapanahak koundaran montok mogowit mangangapu’ kumaa Sabah. Otumbayaan oku nogi’ do tinimungan nu monokodung kumaa koponigompotan angkab om sondikoton Invest Sabah Berhad,” ka disio.
