Hajiji miampai tongo’ nangaalap guminambar miampai puru koumoligan om pakakaraja’ kolidasan id Ramai Kinapatahakan Tindalam Tadau Raya Aidilfitri kumaa Puru Koumoligan om Pakakaraja’ Kolidasan id Lintuhun Auditorium Menara Kinabalu, Kota Kinabalu di tadau baino’.
KOTA KINABALU: Koporintaan Pogun toririmo mamagatang om manahak kopongunsikohan kumaa tinimungan om kotinanan koumoligan i toririmo manahak kojominon do hal koumoligan sosial, ikonomi om kasasanangan mogigiyon nogi’ pomogunon.
Boyoon Montiri, Datuk Seri Haji Hajiji Haji Noor minoboros, tinonggungan tinimungan koumoligan i polubuk timpu, ginawo om tinan id kopotontuan piwolitan pomogunon pointamong om oumolig, suai ko’ koyuon suang pomogunon otoronong om oulud, potilombus dino kapasaga’ mogigiyon poinpasi id koyuon di lobi oumolig, osimbayan om mogiulud om otoronong.
Ka disio, mantad kotoronongon di popuriman, okon nopo ko’ mogigiyon nga nogi’ koporintaan kaanu mindalan do oturundus id inggisaman popoburu’ pogun Sabah, lolobi no montok papalantoi Palan Koburuon Sondikoton Sabah Maju Jaya (SMJ).
“Kotoronongon i popuriman tokou noondo diti nakapasaga’ pomogunon tokou kotilombus koburu’ om kopotungkayan mangangapu’ om tutumombului labus do momonsoi kopoopuan om tumombului kumaa pomogunon tokou, kosuul no kumaa Sabah,” ka disio id Ramai Kinapatahakan Tindalam Tadau Raya Aidilfitri kumaa Puru Koumoligan om Pakakaraja’ Kolidasan id Lintuhun Auditorium, Menara Kinabalu, do hiti, di tadau baino’.
Hajiji ruminamit toluod tindalam Tadau Raya mantad di Molohingon Kotinanan Muafakat Titipan Amal Sawo Mobi’ Rayat, Gabungan Rakyat Sabah (MUTIARA GRS), Datin Seri Hajah Juliah Salag id Ramai Kinapatahakan Tindalam Tadau Raya Aidilfitri kumaa Puru Koumoligan om Pakakaraja’ Kolidasan id Lintuhun Auditorium Menara Kinabalu, Kota Kinabalu di tadau baino’.
Boyoon Montiri minoboros, pakakaraja’ dingguluonon pomogunon, lolobi no tinimungan Unit Tinan Kiunifom, Tinimungan Koumoligan, Pulis om Soujor nogi’ Pakakaraja’ Kolidasan, toririmo popoindalan karaja’ om tinonggungan miampai poinponu’ ginawo om surupukaraja’ di akawas.
“Id timpu tokou kotoguang koyuon agaga’ om koligogon, miagal di timpu pandemik pogulu, toi ontok aantakan liyud om kotutudan, haro tulun i polubuk timpu, ginoris, ginaro om tinan, montok nopo papatantu’ koumoligan puru mogigiyon di suai. Kohondot dilo’, tinimungan ‘fronliner’ kiharo tonggungan di agayo id kopotontuan koumoligan om kasasanangan puru mogigiyon potitikid timpu.
“Daamot tinimungan koumoligan di suai, ilo’ nopo nga’ puru pulis, bomba, soujor om tinimungan kiunifom di suai, sompoopori kitonggungan id kopotontuan koumoligan, kotoronongon om piuludan pomogunon pointatap poinggompi. Karaja’ om tonggungan tinimungan koumolingan toririmo tumoguang do koyuon koligogon, ilo’ nopo nga’ karaja’ i kapabanta’ niawa om tinan,” ka disio.
Minoboros i Hajiji, po’ompus toun 2020 gisom noondo, pipiro kinaantakan kadaaton nokootung pomogunon miagal do pandemik Covid-19 om kadaaton liyud. Di kolimpuunon toun 2024 nopo, pipiro pogun id Malaysia, kaampai Sabah, kosuul no watas Pitas, Paitan, Beluran om Sandakan, naantakan liyud.
Ka disio, i koponoguangan timpu magadau di alaid, koporintaan minaganu katatapan montok popowonsoi karaja’ ‘pembenihan awan’ montok papaharo rasam i kapaampai surupukaraja’ om kabaalon Susumangod Tawan DiRaja Malaysia (TUDM).
“Karaja’ ngaawi’ pembenihan awan idti pinoindalan di koompokon wulan Kotolu katatalib om okiro do ponginsomokan dilo’ nokopogowit asil di osonong. Iti no inggisaman om laang tokou id koponoguangan kadaaton magadau di naantakan,” ka disio pinoposotol.
Hajiji pinapatahak toluod Tindalam Tadau Raya kuminaa di Pesuruhjaya Pulis Sabah, Datuk Jauteh Dikun id Ramai Kinapatahakan Tindalam Tadau Raya Aidilfitri kumaa Puru Koumoligan om Pakakaraja’ Kolidasan id Lintuhun Auditorium Menara Kinabalu, Kota Kinabalu di tadau baino’.
Hajiji minoboros, nosili kinoubasanan om powonsoion koporintaan mongunsikou om mamagatang karaja’ om kolubukan tinimungan koumoligan om tongo’ pakakaraja’ kolidasan i toririmo kosili kukumaraja’ dingguluonon do tikid timpu.
Kohondot dilo’ ka disio, Ramai Kapatahakan Tindalam Tadau Raya montok tinimungan koumoligan om pakakaraja’ kolidasan i pohoroon tikid toun, oponsol om kirati kopio sabaagi kopomusorohan kumaa kinolubukan agayo puru dingguluonon, i masaan poingkaraja’ id poliliput pogun kaampai id piwolitan montok manamong kotoronongon om kosimbayanan tokou po’ompus timpu id timpu kapamaramaian Tadau Raya i dumontol.
Ka di Hajiji, toun diti soginumu’ 15 tinimungan koumoligan om pakakaraja’ kolidasan nakaramit toluod tindalam, kaampai duo mamaramit wagu ilo’ nopo nga’ Koupisan Imigrisin Sabah om Koupisan Kositum DiRaja Malaysia (JKDM) Sabah.
Minoboros isio soginumu’ 33 kotinanan koporintaan kapaampai mantad mogisuai komontirian, koupisan om kotinanan pgoun nogi’ Pisompuruan, komponi poinggompit koporintaan (GLC), Tinan Kikoundangan om tinan okon koporintaan (NGO) nakaampai id kinopomolopotan om kinapatahakan tindalam Tadau Raya.
“Kalansanan inggisaman olidang tokou kopihondot wulan Ramadan diti kapanahak pongunsuban om sunduan kumaa tinimungan koumoligan, pakakaraja’ kolidasan nogi’ kotinanan popogirotkuasa’ montok tumilombus manahak surupukaraja’ miampai poinponu’ tinonggungan montok papatantu’ koumoligan pomogunon, lolobi no id timpu kararamaian diti,” ka disio.
