Yee Tsai Yiew
KOTA KINABALU: Kukumaraja’ koporintaan pogun karamit bayaran koduo diolo’ soginumu’ RM1,000 mantad titahak Ponguhupan Pinotomod Kousinan, miagal di pinahabar doid Bajet Pogun Sabah 2024, dumontol Tadau Agayo Aidilfitri.
Koinsanai pakakaraja’ koporintaan pogun kaampai pakakaraja’ naamot om kuntirik nakaramit bayaran kumoinsan diolo’ soginumu’ RM1,000 di wulan Koiso’, om miampai bayaran koduo diti miampai koinsanai dilo’ karamit titahak soginumu’ RM2,000 kopiongoi di kinopoobian i pinoindalan do Koporintaan Pisompuruan.
Luguan Kopointalangan Parti Bersatu Sabah (PBS) Bohogian Api-Api, Yee Tsai Yiew minoboros, pambayaran titahak diti pokimamahaan kopio lolobi no yolo’ i momonsoi posodiaan mamaramai Tadau Agayo Aidilfitri di dumontol, om kopokito pongunsikohan Koporintaan kumaa toluod tongo’ pakakaraja’ koporintaan kumaa koburuon pogun.
Pinopolombus isio kalansanan miampai titahak diti tongo’ kukumaraja’ koporintaan monimbar pongunsuban montok poposodia’ surupukaraja’ koporintaan pogun di lobi kopulokis om osonong kumaa mogigiyon.
Yiew pinoposotol nogi’ inggisaman koporintaan montok mongingkawas surupukaraja’ koporintaan pogun miampai pinopoobi’ RM25.06 riong mantad Bajet Pogun 2024 kumaa kopoingkawasanan kaparagatan toilaan, komilaan om kabaahan.
“Pasanganu surupukaraja’ koporintaan di osonong om kosudong nopo oponsol montok papatantu’ kalantaion kopoindalanan sondikoton koporintaan maya’ inggisaman Sondikoton Sabah Maju Jaya (SMJ). Kohondot dilo’ kinopoobian diti okito sabaagi iso’ kopoopuan koporintaan okon nopo ko’ montok mongingkawas naangayan surupukaraja’ diolo’, nga’ lobi koponsol po montok popoinggayo toilaan om komilaan diolo’, i aanu gunoon montok papatantu’ visi koporintaan poposili Sabah pogun di doun kaawagu om koburu’ aanu monigampot,” ka disio.
Karait kinoburuon maso-maso po’ompus wulan Ramadan, minamarayou isio inggisaman osonong id ababayan piuhupan pialatan kotinanan koporintaan pogun om swata miagal ababayan Ramai Mongukab Puasa kopihondot Ramadan id pialatan Kim Teck Cheong (KTC) om Unit Lansanon Koburuon Mogigiyon (UPPM) id 25 kinoiyonon doid pototongkop pgoun Sabah.
Minonongkounsikou nogi’ i Yiew kumaa siktor swasta om GLC i minisokodung miampai kotinanan koporintaan maya’ ababayan tonggungan sosiol korporat (CSR) diolo’ i nakapanahak waya’ osonong kumaa mogigiyon nokoiyonon.
Nokunan disio do tonggungan sosiol di agayo id nayatan oinsanan bohogian di nokogompit id kapanahakan ponguhupan miagal dilo’.
