Hajiji minanahak boboroson id ababayan mongukab puasa Gagasan Rakyat Bohogian Sulaman doid Longkod Koubasanan Rumpun Bajau Sama id Lok Batik, Tuaran i notindapou di 1,000 tulun.
TUARAN: Parti komponenom tambalut Gabungan Rakyat Sabah (GRS) kiguno monimbang kokitanan di lobi kagayo miampai popo’iliu do iri no calon di kalantoi id pomilin agayo pogun dumontol, ka di Boyoon Montiri, Datuk Seri Haji Hajiji Haji Noor.
Hajiji po nogi’ Ponorikohon GRS minoboros, noondo diti okon ko’ timpu montok mokikianu (melobi) montok koonuan tindikohon.
“Koduo nopo, yati ngaawi momoguno iso’ simbol ilo nopo simbol GRS. Mantad dilo’ okon ko’ oinsanan kapaampai do tindikohon nga’ nunu i angkabon tokou nopo calon di kaanu lumantoi.
“Kalansanan ku oinsanan lansanon tokou momoguno komiloon pomusarahan id kopotilombusan kopoburuan montok mogigiyon om koburuonon pogun,” ka disio id ababayan mongukab puasa Parti Gagasan Rakyat Sabah (Gagasan Rakyat) Bohogian Sulaman id Longkod Koubasanan Rumpun Bajau Sama id Lok Batik, do hiti, di tadau baino.
Hajiji om tanak disio Mohd. Danish tuminombului Bazar Ramadan doros CSK Kampung Selupoh.
Pinoposorou nogi’ isio di lansanon Gagasan Rakyat id Sulaman do popotilombus poburuon pisokodungan id nayatan siriba’.
“Iti oponsol kopio mantad no do kaantaban i mamaso tokou potoguang,” ka disio i minomohulit do penggal Lintuhun Undangan Pogun (DUN) do noondo opupusan do wulan Kohopod toun obontol.
Hajiji po nogi’ Presiden Gagasan Rakyat minoboros, oponsol nogi’ o lansanon nayatan siriba’ do mindahu’ om mogihum mogigiyon montok mongilo kobolingkahangan diolo’ om mogowit kumaa koilaan do lalansanon akawas.
ADUN Sulaman dilo’ minoboros, do noondo diti haro lobi 200 raan id koiyonon disio kopokito sokodung rayat kumaa Gagasan Rakyat do babaino’ lobi nokoinsawat raramit.
“Oinsanan diti aanu no do monigampot nung osompuru tokou. Ilagon hal di tokoro’ om poinpoopori nga’ intangan kumaa kokitanan lobi kagayo ilo’ nopo nga’ momoguno tokou do koporintaan di ogirot,” ka disio.
Ka disio, koyuon pulitik noondo diti nokoinggayo kaantaban om haro nogi’ timpu do amu’ kosuang pomusarahan.
“Om nogi’ yolo’ (pembangkang) papasaga’ di Hajiji (yoho’) id media sosial mantad no do pagagadau maso-maso i notoguang do Sabah,” k adisio.
Sundung ingkaa, ka di Hajiji, oinsanan lansanon om puru parti kiguno mongigit ogirot di prinsip om komiloon pomusarahan.
Hajiji om tanak disio Mohd. Danish tuminombului Bazar Ramadan doros CSK Kampung Selupoh.
Nunsub disio puru parti do popoindalan tonggungan diolo’ om momusus parti mantad totondos pembangkang.
Talib dilo’, i Hajiji miampai lobi 1,000 mongungundi’ Sulaman minongukab puasa id Longkod Koubasanan Rumpun Bajau Sama.
Pogulu ababayan mongukab puasa, i Hajiji kinoruhang di tanak disio, Mohd. Danish minooi tombului doid Bazar Ramadan id CKS Kampung Selupoh hinombo do minomoli yolo’ do akanon mongukab puasa.
Talib dilo’ minonorikohon i Hajiji mitingan Gagasan Rakyat Bohogian Sulaman id pisuk mitingan Longkod Koubasanan Rumpun Bajau Sama.
