Dr. Joachim (poindikau, kotolu gibang) guminambar pongingitanan miampai mamaramit APC om oinsanan puru Komontirian Koporintaan Koiyonon om Pomuwalaian i nokotindapou id ababayan dilo’.
KOTA KINABALU: Puruankuasa’ Akawas Monoibau Setinggan nointutunan do miampai koinsanai haro soginumu’ 285 koloni setinggan id poliliput Sabah, kapaampai 33,566 tinan walai om 130,397 mogigiyon.
Kumoduo Boyoon Montiri II, Datuk Seri Dr. Joachim Gunsalam i sinili do Kabinet Pogun sabaagi Ponorikohon puruankuasa’ diti minoboros, tolu no watas ilo’ nopo nga’ Ranau, Kota Belud om Tuaran i aiso’ koloni setinggan.
Natag disio tikid watas do haro o palan watas montok monoibau tongo’ setinggan diti.
“Orohian oku kokito lobi kogumu’ watas / Bohogian kikuasa’ Koiyonon (PBT) i sifar setinggan. Watas/PBT i haro ogumu’ koloni setinggan mositi’ no do monigampot koinsiribaon di atalang dumontol koompokon toun 2025,” ka di Dr. Joachim i po nogi’ Montiri Koporintaan Nokoiyonon om Pomuwalaian.
Minoboros isio dilo’ ontok pinapatahak pason id Ababayan Kinapatahakan Gaa’ Surupukaraja’ Abantug (APC) 2023 om Ababayan Pason Montiri Koporintaan Koiyonon om Pomuwalaian Pogun Sabah 2024 id Hilton Kota Kinabalu Hotel, do hiti, di tadau Kolimo (8tw Kotolu).
Dr. Joachim minoboros, nosuhu’ po nogi’ disio o oinsanan PBT poposodia’ ponorisidan di kogunoon pomuwalaian id PBT sompoopori nogi’ mongintutun om popoulud tana’ di poinsodia’ poburuon montok kopoburuan Ababayan Pomuwalaian Mogigihon (PPR).
Dr. Joachim guminambar miampai wookon mamaramit Gaa’ Surupukaraja’ Abantug 2023.
Minongilo nogi’ isio di inggisaman Koupisan Pamalanan Kakadayan om Watas (JPBW) montok poposindak naangayan koupisan.
“Yoho’ sondiri’ nokokito haro kinomogoton osonong lolobi no id kopogintongan om kopolulusan koburuon id Kounsol Mamamalan Pogun i pinonorikohon ku sondiri.
“Monokodung oku inggisaman po’ompus JPBW montok tumilombus mimang buru’ sundung potoguang do kohimpogongan ngaawi’ miagal do kokurian sitaf om i susuai po. Sundung pointoguang kaantaban diti, potitilombus yokoyu popoindalan karaja’ abantug sabab otumbayaan oku karaja’ agaras om sunduan akawas pointatap do okito di bohogian id kawas,” ka di disio.
Dr. Joachim pinoposotol nogi’ do insan po di katatapan Koporintaan Pogun do tongo’ Luguan Adat di haro mantad tilombuson kinoposilihan diolo’, suai ko’ haro atag kopongolonan di tongo’ Puru Lintuhun Undangan Pogun Koporintaan id kinoiyonon dilo’.
“Poingilo oku di pipiro kosusaon id koposilihan tongo’ Luguan Adat id pipiro watas.
“Do poinpuli, insan oku do orohian poposotol di katatapan Koporintaan Pogun do tongo’ Luguan Adat di poinharo mantad tilombuson kinoposilihan diolo’, suai ko’ haro atag kopongolonan di Puru ngaawi’ Lintuhun Undangan Pogun (ADUN) Koporintaan id koiyonon dilo’.
“Atag ngaawi’ dilo’ mositi’ pogibabarasan id Puruankuasa’ nayatan watas, ponorikohon di Upisor Watas pogulu ngaran potoguagon kumaa Koupisan Hal Ngaawi Tanak Mamasok Pogun montok patahakon kumaa doho’ sabaagi Montiri i kitonggungan,” ka disio, i minanangkabayahan mantad kinopoingkawasan elaun koinsanai Luguan Adat minimpuun wulan Kosianm 2023.
Dr. Joachim guminambar miampai wookon mamaramit Gaa’ Surupukaraja’ Abantug 2023.
Dr. Joachim mokianu puru Komontirian, Koupisan, Kotinanan om PBT mongingkawas tinonggungan id kapatahakan surupukaraja’ i po nogi’ posunduran id kopoindalanan nunu i pinoowitan kumaa diolo’ koinsanai.
“Miampai pointanud do tinonggungan id nunu nopo i poindalanon kajamin ilo’ do waya’ kopointalangan karaja’ tadau-adau.
“Kalansananku koinsanai puru Komontirian, Koupisan, Kotinanan om PBT toririmo poposuang id ginawo di koinsanai koponsolon pomogunaan tinonggungan id kopoindalanan karaja’. Miampai nubasanan diti, kapanahak ilo’ kokitanan kumaa mogigiyon do hilo’ id labus do pakakaraja’ koporintaan toririmo otulid id kapatahakan surupukaraja’ kumaa diolo’,” ka disio.
Dr. Joachim mokianu nogi’ koinsanai Kounsol Kakadayan om Kounsol Watas popoinlipat inggisaman papagaras PBT sompoopori miampai poposuul surupukaraja’ kumaa mogigiyon sompoopori.
“Nokopotimpuun oku kapamanahan kumaa koinsanai PBT id pogun Sabah miampai tuminombului Kounsol Watas Tenom, Nabawan, Keningau om Tambunan. Gisom doondo diti, okito ku do kobolingkahangan i otoguang do PBT kikiro do mogiagal. Wookon dilo’, kapaampai kokurion kousinan om sitaf. Kogogonopan kosukupan om kogogonopan PBT i kogumuan dilo’ nakalaid om amu’ noinsonongan kososodong.
“Pinosorou ku tongo’ Presiden om Upisor Eksekutif di prinsip do tikid PBT dilo’ apatut minggisom kumaa kopimpooporian id sunduk kousinan, om okon ko’ tumalahan kumaa toluod om kapanahakan mantad koporintaan.
“Koinsanai PBT mositi’ no minggisom maganu nindopuan om mongilag kopomirubatan nogi’ kalawason.
“Tikid PBT nga’ kiguno pasanganu sinuratan koposuulan tongo’ projik koburuon, tumanud kogunoon do koponsonsog PBT sompoopori om okon ko’ tumanud di sinuratan tongo’ upalai mantad bohogian labus. Koburision koiyonon PBT sompoopori mositi’ no toririmo pointamong.
“Tongo’ Presiden om Upisor Eksekutif mositi’ no do maganu laang aparagat montok manalasai kobolingkahangan maso-maso, miagal do kopomurisian di po’ompus om okon ko’ mindad gisom tongo’ konsesi pomurisian do osili.”
Minoboros isio, haro nogi’ wookon PBT i minsimbayan rumikot kumaraja’ amu’ tumanud timpu kukumaraja’ koporintaan.
“This is simply not to be tolerated.” Montok kopoilaang, bohogian Komontirian papaharo ‘spot check’ do po’ompus timpu om iti kosili iso’ pogintongan naangayan karaja’ toi KPI.
“Orohian oku nogi’ poposorou tongo’ PBT di ruputan ginumuan i asaru’ korikot kumaa doho’ karait rontob koburision, nogi’ tongo’ sumbu ralan di amu’ kaapui do doungotuong,” ka disio pinoposotol.
Pinokianu disio koinsanai PBT do toririmo aparagat maganu laang kopongundaran pogulu pia do haro ruputan.
“Ingkaa nogi’ i korikotan doid upis di pakakaraja’ PBT, kaampai no tongo’ upisor takawas dau. Koilo oku di pomusarahan ginumuan do tongo’ Presiden, Upisor Eksekutif om tongo’ Upisor Totuo PBT osusa’ do momoruba’ id upis. Podulion poinwagat ku o haal diti om pipiro laang pinointutunan do Komontirian montok monginsonong haal diti,” ka disio.
Minanangkabayahan kumaa koinsanai mamaramit Gaa’ Surupukaraja’ Abantug 2023 om Gaa’ Pinotomod do sodop dilo’, Dr. Joachim minoboros, Gaa’ Surupukaraja’ Abantug nopo nga’ iso’ poimpahan montok mongunsikou di puru Komontirian i nokopokito naangayan abantug om naangayan di kopoondos po’ompus toun 2023.
Kalansanan disio kopongokunan diti kosili pongunsub om posindak sunduan montok diolo’ tumilombus mongingkawas po do kalantaion do timpu dumontol om kosili ‘role model’ kumaa tambalut karaja’ di suai.
“Kalansananku kapamaga’an diti kapanahak waya’ pongunsuban karaja’ di osonong kumaa koinsanai puru Komontirian, Koupisan om Kotinanan id siriba’ komontirian doid koponuridongan om kopoinggirotan po do koyuyuon pakarajaana di abantug kopiongoi di sindikoton Komontirian om Koporintaan,” ka disio.
Minonongkounsikou nogi’ isio mantad tinonggungan diolo’ i nokopinsin id po’ompus timpu poingkaraja’.
“Kalansanan dokoyuon koinsanai onuan kolidasan osonong om kalansanan yokoyu ngaawi’ kalantoi id nunu nopo kaganaan di ampayaton. Kumaa dokoyu kounsikohan monoguang kinopinsinan.
Nokotindapou nogi’ Monguhup Montiri I, Datuk Isnin Aliasnih; Monunurat Pointatap Komontirian, Datuk Dr Jamili Nais; Monunurat Pulitik Komontirian, Datuk Jonnybone J. Kurum; Kumoduo Monunurat Pointatap I om II, Stanley Chong om Faridah Giau; tongo’ Potunud Kotinanan Komontirian; tongo’ Presiden Kounsol Kakadayan; tongo’ Upisor Eksekutif; om oinsanan puru karaja’ Komontirian.
