Hajiji (poindikau, tanga’) guminambar miampai wookon i nokotindapou id Ababayan ‘Santai Bersama Peserta (Fasilitator)’ Kopihondot Kurusus (ToT) Kopoinggirotan Kopomuruanan Gagasan Rakyat, Palace Hotel di kaawagu diti.
KOTA KINABALU: Oinsanan kukumaraja’ popogura’ parti kaampai fasilitator papamanau tonggungan agayo sabaagi tukod kukumaraja’ dingguluonon montok popoindalan inggisaman om koburuon i owiton Koporintaan Pogun id timpu tolu toun diti kumaa mogigiyon, ka di Boyoon Montiri, Datuk Seri Haji Hajiji Haji Noor.
Presiden Parti Gagasan Rakyat Sabah (Gagasan Rakyat) i po nogi’ Ponorikohon Gabungan Rakyat Sabah (GRS) dilo’ minoboros, do iti sabab no tutumanud kaampai oinsanan fasilitator dilo’ kosili kukumaraja’ dingguluonon kumaa parti monoguang Pomilian Agayo Pogun (PRN) dumontol.
“Amu’ no korikot duo toun, mokianu tokou no kawagu mantad mantad mogigiyon. Kohondot dilo’, nunu i oponsol, pointalangon tokou inggisaman om koburuon i noowit do Koporintaan GRS po’ompus timpu pinomorintaan, kumaa mogigiyon id nayatan siriba’.
“Sabaagi iso’ tiim, kiguno tokou misokodung. Mantad dilo’, pokionuon ku toinsanan popogura’ kukumaraja’ parti om fasilitator do soira’ mindahu’, pointalangon kumaa mogigiyon poingkuro koporintaan maso-maso diti nokopoindalan mogisusuai koburuon montok monumboyo’ mandat mogigiyon,” ka disio id ababayan ‘Santai Bersama Peserta (Fasilitator)’ kopiondot Kurusus (ToT) Kopoinggirotan Kopomuruanan Gagasan Rakyat, do hiti, di kaawagu diti.
Hajiji minoboros, palan koburuon Hontolon Sabah Maju Jaya (SMJ) i nowit do Koporintaan Pogun id nimpohon di kohunung.
“Maya’ ababayan SMJ diti, pinopointutun tokou do katatapan osuau papaapu’ miampai minogowit lobi kogumu’ mangangapu’ do minangapu’ id pogun diti, kituduan mongimbulai kosiwatan pakarajaan kumaa tangaanak tokou.
“Suai mantad dilo’, Koporintaan Pogun pinapaharo pitimungan sompomogunan, minagalap mangangapu’ labus om nokoiyonon do minintong kosiwatan i haro id Sabah. Oinsanan inggisaman diti montok papasarok ikonomi, manahak kosiwatan pakarajaan om mongingkuri’ komosikinan id pogun diti.
“Iti no ralan tokou do popoburu’ om mimang oku lansanon om fasilitator mogowit koinsanai inggisaman di nokoindalan, masaan om i maan powonsoiyo’ ontok mindahu’ rumuba’ mogigiyon id nayatan guas,” ka disio.
Daamot dilo’, minoboros isio, fasilitator nga’ kiguno manahak koposotolan di koponsolon pisompuruan id nayatan mogigiyon doid pogun diti.
“Nung rumuba’ do mogigiyon id kinoiyonon sompoopori, pointalangon songkuro koponsolon popoinggirot pisompuruan amu’ momuntuk tinaru om ugama’,” ka disio.
