Haji Hajiji Haji Noor
KOTA KINABALU: Kabinet Pogun pinopolulus Polisi Pomorunan Biojisim Piasau Sawit Pogun Sabah, ka di Boyoon Montiri, Datuk Seri Haji Hajiji Haji Noor.
Minonorikohon mitingan talib-kabinet Koupisan Boyoon Montiri id Menara Kinabalu di tadau baino’, minoboros isio, Kabinet pinapatantu’ nogi’ montok mongontok Sukai Dagang Pogun (CJN) kohondot kopoudaran biojisim piasau sawit lumabus mantad Sabah gisom po do koindalan katatapan diti.
“Iti kituduan manamong kopoudaran biojisim piasau sawit,” ka disio i pinopointalang do Enakmen Biojisim (Biomass) Piasau Sawit Pogun Sabah maan posodiao’ montok manamong popoindalan pomorunan biojisim piasau sawit id Sabah.
Hajiji (tanga’) miniboboros miampai di Mayor Kota Kinabalu, Datuk Sabin Samitah katalib kinopongoon mitingan.
Kopoindalanan katatapan diti kotimpuun id timpu duo toun mantad tadau kinopolulusan dilo’ (soira’ o POIC Sabah Biomass Collection Platform koindalan do poinponu’) om piantangan do Komontirian Koburuon Pomorunan om Mogindapu’.
Hajiji pinopoilo nogi’ di tongo’ luguan koupisan id siriba’ Koupisan Boyoon Montiri (JKM) do Kabinet Pogun nokoilo di laang koponginsonongan ponguludan Puruankuasa Dounmogigiyon Suang Kakadyan (JKDB) di Komontirian Koporintaan Koiyonon om Pomuwalaian.
