Jahid pinapatahak ponguhupan soginumu’ RM10,630 kuminaa di Sadia, om sinasi’ di Finian nogi’ lalansanon mogigiyon suai i nokotindapou.
TAMPARULI: Koporintaan Pogun toririmo opoduli’ om papatantu’ tanak sikul toi susumikul i kosudong amu’ otoliban mantad mamaramit ponguhupan koporintaan.
Montiri Koburuon Labus Kakadayan Sabah, Datuk Jahid Jahim minoboros, koporintaan maya’ komontirian om kotinanan poinggompit toririmo papatantu’ koburuon om naangayan sikul id watas labus kakadayan, potilombus dino kopongikip pisuayan balajaran kakadayan om labus kakadayan.
“Oinsanan inggisaman powonsoiyon okon nopo ko’ manahak koundaran agayo kumaa tongo’ sikul, nga nogi’ mogigiyon do koinsanai,” ka disio id Ramai Kinapatahakan Ponguhupan kumaa Sikul Kabansaan (SK) Kapa, doros hiti, di tadau baino’.
Nokotindapou nogi’ i Monunurat Pulitik Komontirian Koburuon Labus Kakadayan Sabah, Jilias Lintar, Molohingon (YDP) Koisaan Molohing om Mongingia’ (PIBG) SK Kapa, Finian Rindum, Ponorikohon Puruankuasa’ Koburuon om Koumoligan Kampung (JKKK) Kapa, Jasrin Basinau, sitaf Upis Montiri om Lansanon mogigiyon pososorili Tamparuli.
Ka di jahid, Koporintaan Pogun toririmo maganu laang montok papatantu’ mogigiyon pgoun diti kaanu balajaran di osonong.
“Suai ko’ ponguhupan mantad porinta’, om lansanon diri sondiri, kiguno tokou nogi’ momoguno tongo’ karalano’ kreatif montok popoinsanang karalano’ do monginggaan tonggungan molohing om manahak sunduan kumaa susumikul ngaawi’ do monilombus pinsingilaan tadau-adau,” ka disio.
Id ababayan dilo’, Jahid po nogi’ ADUN Tamparuli, minonongkounsikou om kotilombus kalantoi kumaa di Molohingon Mongingia’ SK Kapa, Hjh Sadia @ Sadiah Haji Yahya, i kopinsin do amu’ no alaid diti.
“Kalansanan dahai di sigu do tumilombus papatahak surupukaraja’ kumaa paganakan, mogigiyon om pogun nogi’ oinsanangan koinsanai pitorinaan id koposion do posusuhut, insyaallah,” ka disio.
“Kotongkiadon di sigu om sikul diti tantu’ agayo kopio rati tu’ ogumu’ kouhupan i nakatahak disio okon nopo ko’ id kinopongimbulaian do ‘modal insan’ nga nogi pinapatantu’ SK Kapa nakaanu tumopong di sikul labus kakadayan di suai,” ka disio.
Nokopogulu, i Sadia minoboros, mongunsikou isio ponguhupan di Jahid kumaa sikul dilo’ mantad podi pogulu gisom no do baino’.
Toluod di Jahid soginumu’ RM10,630 nopo dilo’ nga’ montok monguhup koponginsonongan pagagawasan sikul, pomoli posokoton koubasanan, om okuri’ tabung kumaa PIBG sikul.
Montok rikod, SK Kapa do noondo haro 80 susumikul kaampai susumikul prasikul.
