Dr. Joachim (kotolu, wanan) pinapatahak baju korporat kuminaa songulun mantad Momuruan Adat montok DUN Kundasang.
RANAU: Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, Kabinet Pogun nakaakun mooi do karaja’ koinsanai mongingigit adat timporonon.
“Kabinet pinapatantu’ do koinsanai karaja’ tongo’ mongingigit adat tilombuson suai ko’ yolo’ i sumakit om amu’ nodi kaanu kumaraja’, toi haro tongo’ kobolingkahangansuai nogi’ nung haro kopokionuan di nombo-nombo mongongobi’ rayat koporintaan id toisoiso’ koiyonon do momonsoi kopongolonan.
“Id Komontirian monimbang dilo’,” ka disio.
Isio po nogi’ Puru Lintuhun Koundangan Pogun (ADUN) Kundasang minoboros dilo’ id Ramai Kinapatahakan Baju Mongingigit Adat kumaa koinsanai momuruan adat id DUN Kundasang doid Lintuhun Kampung Kimolohing, do hiti di konihab.
Minanangkabayahan kumaa manganganjur i nokopotimung soginumu’ 100 momuruan adat i kapaampai do Luguan Mamasok Pogun (KAN), Mobi’ Luguan Mamasok Pogun (WKAN), Luguan Mogigiyon Sia’ om tongo’ Molohingon Kampung id DUN Kundasang, minoboros isio, ababayan dilo’ kopokito kopodulianan Koporintaan Gabungan Rakyat Sabah – Pakatan Harapan (GRS-PH) Plus kumaa koguugunoon koinsanai kaampai no tongo’ mongingigit adat.
Suai diti, Koporintaan Pogun nga’ pinopoingkawas elaun diolo’ minimpuun wulan Kosiam toun nakatalib, ka disio kawagu.
Mantad dilo’, pinokianu disio koinsanai mongingigit adat mooi do tumilombus monokodung koporintaan maso-maso i momorinta’ sabab yolo’ nga’ somboogian mantad kukumaraja’ id nayatan guas montok monguhup koporintaan.
Pinoposorou isio sabaagi mongingigit adat kiguno yolo’ popoindalan karaja’ om tonggungan om popotoronong koyuyuon mogigiyon koiyonon.
Poingkuro po, ka disio, bohogian dau amu’ bakangon montok maganu laang kumaa diolo’ (mongingigit adat) i mongumpilin koporintaan.
Nokotindapou nogi’, Monunurat Pulitik kumaa di Dr. Joachim, Yubidi Gompyo; mobi’ Luguan Watas, KAN Dualis Porodtong om Ponorikohon Manganganjur Ababayan, KAN Dominic Ghani nogi’ sitaf Kuut Mamasok Pogun, DUN Kundasang.
