Wilfred Madius Tangau
KOTA KINABALU: Puru Parlimen Tuaran, Datuk Seri Wilfred Madius Tangau minokianu Montiri Pisompuruan Negara Datuk Aaron Ago Dagang om Montiri Intodonon Tulun Steven Sim Chee Keong mooi do monimbang montok popointutun ‘cuti terapung’ (suti toi tadau koundarangan poinhabu) montok papasaga’ mogigiyon Malaysia i kiharo tungkusan ‘minoriti’ (okuri’ ginumu’) mamaramai kararamaian koubasanan om ugama’ diolo’ miagal mogigiyon Malaysia mantad mogigiyon tinaru di lobi kogumu’.
Minaganu poiradan Thaipusam i po nogi’ suti’ kogumuan id Kuala Lumpur, Putrajaya, Johor, Negeri Sembilan, Perak, Pulau Pinang om Selangor, montok koinsanai mogigiyon Malaysia, minoboros isio, di toun 2021, suti’ Thaipusam nga’ tiningkadan ilo’ do koporintaan pogun Kedah di ontok dilo’.
“Koondos kopio sabab Koporintaan Pogun Kedah pinapatantu’ kawagu Thaipusam sabaagi suti’ pinotomod. Iti kopokito pogoyuon nosukod kumaa tungkusan mogigisuai koubasanan Malaysia di opuawang.
“Poingkuro po, tulun kikotumbayaan Hindu i poingiyon id walu’ watas/pogun suai kaampai Sabah om nogi’ Watas Pisompuruan Labuan kiguno kumaraja’ om minsingilo. Kaanu tokou nopo do lumansan iti amu’ kopolomog koyuyuon pamaramaian diolo’.
“Nawawaya’an diti nga’ pinoilangan nogi’ di hinotusan noribu tulun Kadazan-Dusun-Rungus, Murut om Dayak i poingiyon id labus kinoiyonon nantadon diolo’ ontok Kaamatan, Kalimaran om Gawai.
“Norikot nodi timpu dau montok Malaysia sumili lobi kipogisusuaian, aadas om kapaampai di kararamaian koubasanan om ugama’ minoriti.
“Kada’ pasalao’ pamarati. Amu’ oku monuhu’ montok momoruhang ginumu’ suti’ kogumuan, i pikikiro doti’ do kopongingkuri’ ‘produktiviti’. Nga’, papaatag oku ralan di lobi kosonong montok mongulud suti’ kogumuan dati’ miampai papatantu’ ginumu’ koinsanai pointatap, nga’ papasaga’ puru minoriti mongolon wookon mantad suti’ di lobi kokoro’ montok karamaian diolo’ sondiri,” ka disio id iso’ kointalangan.
Madius, po nogi’ Ponorikohon Yayasan WISOM minoboros, nubasanan diti roitan do ‘cuti terapung’ om gunoon ilo’ do Indonesia om Kotinanan Tinaru-Tinaru Misompuru (PBB).
Minoboros isio, montok kogumuan pomorunan, iti pikikiro doti’ koponinong koyuon ‘sopilantoi’, miampai pakakaraja’ maganu gontok montok mamaramai kararamaian diolo’, naamot ginumu’ tadau pongindopuan pikikiro ruhangan.
“Puru mogigiyon minoriti nga’ kapamaramai nogi’ do kararamaian diolo’ sondiri om amu’ kopuriman au’ opoduli’,” ka disio.
Katalib kinopotingkodan suti’ Thaipusam do Kedah di 2021, Yayasan Wisdom pinapalabus ruputan ki’uhu “Selepas Thaipusam, masa untuk mempertimbangkan cuti terapung” di Freeda Jane Tangau, minonorisid poingkuro iti do aanu popowonsoi.
https://static1.squarespace.com/static/6040b1a3e851e1398369dc9e/t/60a230c5e93ae07ca707 9817/16212420570
“Kalansanan ku Montiri, Aaron om Montiri, Steven Sim maganu okuri’ timpu montok monorisid atag diti om monimbang kopoindalanan dilo’. Okon toi ko’ iti nopo nga’ kopokitanan atalang sunduan Madani i pointutunan do Koporintaan Perpaduan?”
Kalansanan nogi’ disio goduduo koporintaan watas Sabah om Sarawak kapanahak kopomuruanan maya’ poombitanan do suti’ terapung, sabaagi pamantangan kumaa tungkusan tokou di opuawang, momonsoi kes montok koporintaan pogun Malaysia Kotonobon montok mamaramai Kaamatan, Kalimaran om Gawai.
“Kalansanan pogulu kosimban undang-undang, pipiro touki i monokodung kopogisusuaian koubasanan nga’ maganu inggisaman sondiri’ montok popointutun nubasanan diti id komponi diolo’.
“Maha’ daa soira’ tokou mamaramai Thaipusam do obontol, koinsanai tutumanud Hindu id tikid koiyonon, pogun om watas pisompuruan id Malaysia kiharo sumpili’ montok mamaramit dilo’ id walai,” ka disio i minamason kotobian mamaramai Thaipusam kumaa oinsanan tutumanud Hindu om mogigiyon Malaysia di suai i tumonggoi mamaramai kararamaian montok momuhondom kinalantaion Dewa Hindu Murugan kohondot ‘syaitan’ Surapadma.
