Hajijij (gibang) miampai ponokotanda’ minamaramit Kuasa Panamangan Kopoindalanan Pangaba’ Lotiirk Sabah mantad di Fadillah.
KOTA KINABALU: Koporintaan Pogun popoindalan tikid inggisaman i napalan tumanud Kuasa Panamangasn Kopoindalanan Pangaba’ Lotirik Sabah i noondo diti pasanganu do Sabah, miampai rikoton di nakatatap id Sabah Energy Roadmap and Masteplan 2040, ka di Boyoon Montiri, Datuk Seri Haji Hajiji Haji Noor.
Ka disio, Sabah tumilombus misokodung miampai Koporintaan Pisompuruan doid kopotontuan kopoindalanan koinsanai inggisaman montok mongingkawas po do naangayan pangaba’ lotirik id pogun diti.
Minoboros isio, Koporintaan Pogun nga’ tumilombus nogi’ misokodung miampai Sabah Electricity Sdn. Bhd. (SESB) id kopoinsanangan om kapanahakan sokodung id kopoindalanan Palan Kosimbanon SESB kumaa kogiroton komponi kogogonopan dilo’.
“Koporintaan Pogun maya’ Energy Commision of Sabah (ECoS) papatantu’ kogompitan miampai mitilombus koinsanan mongingigit tonggungan id pogun Sabah montok papatantu’ kobolingkahangan ngaawi’ aanu monoibau miampai ralan di lobi kiwaya’ om po’ompus,” ka disio id Ramai Ponokopatahakan Kuasa Manamong Kopoindalanan Pangaba’ Lotirik Sabah do Koporintaan Pisompuruan kumaa Koporintaan Pogun id Pisuk Miitngan Agayo, Menara Kinabalu, do hiti, di tadau baino’.

Hajiji miampai di Fadillah suminasi’ kinapatahakan 7 projik nopongo montok Tinimungan Projik Pinotomod Pangaba’ Lotirik Sabah mantad di Dr. Ching (wanan) kuminaa di Safar.
Kumoduo Luguan Montiri II po nogi’ Montiri Koundolihon Ginoris om Ginaras Guno Koporintaan (Peralihan Tenaga Dan Daya Guna Awam), Datuk seri Haji Fadillah Haji Yusof minongobi’ Koporintaan Pisompuruan miampai ponokotanda’ pinapatahak kuasa’ dilo’ kumaa Koporintaan Pogun Sabah.
Hajiji minoboros, karaja’ koponowolianan Kuasa Manamong Kopoindalanan Pangaba’ Lotirik om Ginaras Oinwoguan do Koporintaan Pogun pinapanau katalib Enakmen Pangaba’ Lotirik 2024 om Enakmen Ginaras Oinwoguan nokolulus id pitimungan pinotomod Lintuhun Undangan Pogun Sabah di ko 3tw Koiso’ katatalib.
Kohondot dilo’, isio id koobian Koporintaan Pogun pinopolombus kopongunsikohan kumaa Koporintaan Pisompuruan i pinopolulus kopoindalanan ponowolianan panamangan kopoindalanan miampai osonong om poingulud.
“Iti kopokito piupakatan om sunduan misokodung di akawas id pialatan Koporintaan Pisompuruan om Koporintaan Pogun,” ka disio pinoposotol.
Hajiji pinopolombusn oig’ kopongunsikohan kumaa Koporintaan Pisompuruan mantad kinapatahakan karaja’ manamong kopoindalanan pangaba’ lotirik Pogun Sabah kumaa Koporintaan Pogun Sabah, kinapatahakan dokumen pinotomod mantad Luguan Monunurat (KSU) Komontirian Koundolihon Ginoris om Ginaras Guno Koporintaan kuminaa Monunurat Koporintaan Pogun (KSN) Sabah om kinapatahakan ‘plague’ projik nopongo mantad KSU Komontirian kuminaa SKN Sabah.
“Kalansanan oinsanan inggisaman diti koowit Sabah kumaa rontob pangaba’ ginaras di lobi kiginoris kotumbayaan montok kasasanangan mogigiyon pogun diti,” ka disio pinoposotol.
Nokotindapou nogi’ id ababayan dilo’ i Kumoduo Boyoon Montiri II po nogi’ Montiri Karaja Agayo, Datuk Ir. Shahelmey Yahya; Montiri Koburuon Mongindapu’ om Koperasi Pisompuruan, Datuk Ewon Benedick; Monunurat Koporintaan Pogun, Datuk Seri Sr. Safar Untong; Luguan Monunurat Komontirian Koundolihon Ginoris om Ginaras Guno Koporintaan, Dr. Ching Thoo A/L Kim; Luyar Agayo Pogun Sabah, Datuk Nor Asiah Mohd., Yusof om i Luguan Upisor Eksekutif ECoS, Datuk Ir. Abdul Nasser Abdul Wahid.