Dr. Joachim (tanga’) miniboboros miampai dilo’ songulun Upisor mantad KPKT (Pisompuruan) ontok tuminombului walai PPR Kibabaig, om poingintong i Dr. Jamili (gibang) om i Francis (koduo, gibang).
PENAMPANG: Apat mantad koinsanai onom blok Ababayan Pomuwalaian Mogigiyon (PPR) id Kibabaig do hiti do babaino’ poinsodia’ montok iyonon, naamod i duo po kakal id kopongundaran doid blok om tisan nulu.
Pinoilo do apat blok dilo’ kisuang 443 unit walai om surat kopouyuhan montok moniwa’ kumaa di kosudong mongingiyon walai PPR diti patahakon kumaa diolo’.
Yolo’ kaanu miyon id unit sompoopori mimpuun wulan Koudo om Kotolu, naamot duo kawagu blok i kakal id kopongundaran kisuang do 134 unit walai.
Kumoduo Boyoon Montiri II po nogi’ Montiri Koporintaan Koiyonon om Pomuwalaian (KKTP), Datuk Seri Dr. Joachim Gunsalam pinapaharo kotombuluyan kuminaa PPR dilo’, di konihab (18tw Koiso’).
Dr. Joachim (koduo, wanan) id koiyonon walai PPR montok minintong tisan nulu iso’ mantad blok miampai dii Dr. Jamili (wanan) om i Francis (kotolu, wanan).
Id kinotombuluyan dilo’, nonuan isio kopointalangan di Upisor Eksekutif (PE) Kounsol Watas Penampang (MDP), Robert Malangking om upisor mantad Komontirian Pomuwalaian om Koporintaan Koiyonon Pisompuruan (KPKT).
Nokotindapou nogi’ i Monunurat Pointatap KKTP, Datuk Dr. Jamili Nais; tongo’ Puru Kounsol Penampang, tongo’ upisor om sitaf KKTP, nogi’ lansanonn nokoiyonon.
Dr. Joachim minoboros, MDP masaan monorisid rinibuan upalai om mongungupalai di kosudong montok pilion do moniwa’ walai PPR diti.
“Iti kopokito kakal ogumu’ o mogigiyon di momoguno pomuwalaian miagal diti om Koporintaan Pogun mamaso mongintutun tongo’ lot tana’ koporintaan i kosudong ponuridongan PPR tumanud kooturan Koporintaan Longkod (KPKT) ilo’ nop onga’ tana’ kosudong kiguno poinsodia’ om kopoobian patahakon no montok mamawaal linimput dilo’ mooi do mongilag projik sumakit,” ka disio.
Naamot dilo’, Upisor Watas Penampang, Francis Chong minoboros, kinotombuluyan montiri dilo’ nopo nga’ montok popoinsanang koponguludan karaja’ id pialatan KPKT, KKTP om MDP.
Kalansanan nogi’ disio koinsanai onom blok PPR dilo’ oiyon id timpu oruhai om koinsanai karaja’ koindalanan poinsonong.
