Hajiji minonorikohon mitingan kumoiso’ pasca kabinet Koupisan Boyoon Montiri toun diti.
KOTA KINABALU: Kabinet Pogun nakaakun minonuridong tinimungan kukumaraja’ montok miontong hal waig om lotirik id Sabah, ka di Boyoon Montiri, Datuk Seri Haji Hajiji Haji Noor.
“Tinimungan kukumaraja’ i buruanon di Monunurat Koporintaan Pogun, Datuk Seri Sr. Safar Untong papaharo mitingan sominggu insan toi tikid duo minggu montok miontong koinsanai hal kapaampai pangaba’ waig om lotirik,” ka disio ontok minonorikohon mitingan pasca kabinet Koupisan Boyoon Montiri id Menara Kinabalu, do hiti, baino’.
Boyoon Montiri minoboros, Kabinet Pogun nga’ minonuhu’ nogi’ koinsanai luguan komponi poinggompit koporintaan (GLC) Pgoun mongilag mantad papahabar toi papalabus kointalangan karait projik koburuon miampai aiso’ nunu-nunu kapasagaan mantad Kabinet.
Minoboros isio, oinsanan GLC Pogun pokionuon sumuku’ kumaa montiri sompoopori toi Kabinet Pogun pogulu momonsoi nunu-nunu pibatosan montok mongilag waya’ araat do timpu obontol.
“Kabinet mintong poinwagat hal diti,” ka disio.
Hajiji tuminabi’ di Abidin om puru ngaawi’ mitingan di suai.
Id boboroson disio, Boyoon Montiri pinopoilo do pipiro naangayan, lolobi minonowoli kuasa’ manamong do pangaba’ ginoris do Koporintaan Pogun mantad Koporintaan Pisompuruan.
Nookunan nogi’ disio naangayan ogirot tanak komponi Koporintaan Pogun di kotuturidong, SMJ Energy Sdn. Bhd.
Pinointalang disio do SMJ Energy Sdn. Bhd. nakabayar no do noolos RM5 riong kumaa Koporintaan Pogun id suang timpu amu’ koriokt sontoun kinoponuridongan dilo’.
“Minimpuun do komponi aset sifar, pasanganu ilo’ do lobi RM5 bilion aset gisom di wulan Kohopod om Duo 2023,” ka disio, i minoboros SMJ Energy nga’ nakalantoi nogi’ minongimbulai sukuk wakalah RM900 bilion id siriba’ ababayan sukuk wakalah mogisusuai mato tusin komponi gisom RM10 bilion id gatang nominal di toun nakatalib.
Hajiji tuminabi’ dilo’ pipiro tulun momuruan koupisan id siriba’ Koupisan Boyoon Montiri.
Kinalantaion suai id siriba’ poindalanon SMJ Energy nopo nga’ kinoponowolianan 50 pihatus kosongonuan id kopolobusan medan tumau Samarang, 25 pihatus koponsolon id Samur om loji LNG doros tisan rahat id Taman Pomorunan Tumau om Gas Sipitang (SOGIP).
Nokotindapou nogi’ tolu Monguhup Montiri kumaa Boyoon Montiri, Datuk Abidin Madingkir, Datuk Nizam Abu Bakar Titingan om Datuk Haji Ruslan Muharam, Safar, Luyar Agayo Pogun, Datuk Nor Asiah Mohd. Yusof, Mayor Kota Kinabalu, Datuk Seri Dr. Sabin Samitah om tongo’ luguan koupisan.
