KOTA KINABALU: Sabah nokoposurat kinolintuhunon kes denggi di toun nakatalib nga’ kinapataion gama-gama’ pompogon denggi nokoinsawat.
Potunud Kolidasan Pogun Sabah, Datuk Dr. Asits Sanna minoboros, Koupisan Kolidasan Pogun Sabah nokoposurat soginumu’ 6,983 kes denggi i pinoruput gisom ko 30tw Kohopod om Duo otun nakatalib (Minggu Epidemik 52 – ME52), ilo’ nopo kinoinsiribaon soginumu’ 1.8 pihatus nung piadangon toun 2022 (7,110 kes).
Ka disio, id timpu di miagal haro 11 kinapataion gama-gama’ pompogon denggi miampai rontob kinapataion soginumu’ 0.16 pihatus, nakapaampai walu’ watas ilo’ tolu id Sandakan, duo id Kunak om sopipoopori iso’ id Papar, Semporna, Kudat, Nabawan, Putatan om Tuaran.
“Iti nopo kinoingkawason soginumu’ 10 pihatus, nung piadangon timpu miagal toun nakatalib miampai 10 kinapataion gama-gama’ tomporuruol pompogon denggi,” ka disio id kointalangan di konihab.
Dr. Asits minokianu nogi’ tulun ginumuan maganu laang kopongilagan, wookon popowonsoi ababayan mogihum om momunso id pososorili’ kinoiyonon 10 minit tikid minggu’ om mitatabang id koiyonon sompoopori, sabab tumanud kointalangan mantad Koupisan Meteorologi Malaysia pikikiro aantakan rasam asapou nosusuhut timpu Monsun Timur Laut (MTL), id po’ompus wulan Koiso’ om Koduo 2024.
“Suai dilo’, tulun ginumuan pokionuon mongumolig tinan mantad okokot tondui miagal momoguno ‘repelan’ om totobpus ‘aerosol’ id timpu tondui aparagat do minsusuab (5 – 7 kosuabon) om doun minsosodop (5 – 7 sodopon), nogi’ mokianu pongusapan osopung id nombo-nombo kogogonopan kolidasan nung kitanda’ no do pompogon denggi miagal lumasu’, ongoruol pilangaban/tulang/masol, oruol tulu di adalaan om nogi’ oruol id guas mato,” ka disio.
Mokianu kointalangan kaawagu denggi id aplikasi iDengue toi maya’ laman web iDengue id https://idengue.mysa.gov.my/
