Dr, Joachim (koonom, gibang) guminambar pongingitanan miampai tombului naalap i nokotindapou katalib pinopoindalan gimik kopohimaganan ababayan monimpuun timpu pongintoban id plak pongintob timpu Kounsol Watas kumaa Kounsol Kakadayan Penampang nokotimpuun id suang timpu 90 tadau.
PENAMPANG: Kounsol Watas Penampang poingkawason rontob suminili Kounsol Kakadayan.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam pinopoimpuun ababayan pongintoban timpu (countdown) ilo’ nopo nga’ ponokotanda’ kosimbanon Kounsol Watas Penampang kumaa Kounsol Kakadayan Penampang id luan Linimput Wisma Kounsol Watas Penampang, do hiti, di tadau baino’.
Minoboros isio, timpu kosimbanon kumaa Kounsol Kakadayan nopo nga’ oponsol montok papatantu’ tongo’ karaja’ ponimbanan popopoindalan om kapatahakan surupukaraja’ aanu papapanau poinponu’, kopiongoi di kopoingkawasan rontob dilo’.
Minanangkabayahan isio kumaa di Francis Chong sabaagi Ponorikoon Kounsol Watas Penampang om Upisor Eksekutif, Robert Malangking mantad kinalantaion minomuruan tiim Kounsol Watas Penampang gisom nakaanu kolulusan montok poingkawason rontob sabaagi Kounsol Kakadayan Penampang.
Dr. Joachim (kolimo, gibang) minamaramit tandamato mantad di Chong.
Kopiongoi di kinopongokunan i maan patahako’ dilo’, Dr. Joachim lumansan puru Kounsol Watas Penampang kopoindalan koponguludan di opulokis om kitonggungan akawas; kiwaya’ doid kopoindalanan tongo’ karaja’ di patahakon; maganu ponginsomokan popodigital kapapanahan kapatahakan surupukaraja’ montok popoinsanang pitorinaan mongingigit tonggungan Bohogian Kikuasa’ Nokoiyonon (PBT); maganu ponginsomokan papasanang surupukaraja’ miampai kopoburuan ikonomi om mogihum tongo’ intodonon asil wagu PBT; om popoindalan koponguludan kousinan di ogirot.
“Hal ngaawi’ diti oponsol kopio montok poposiau kopoburuan sosonginan PBT,” ka disio pinoposotol.
Minoboros isio, PBT nopo nga’ iso’ tinan koporintaan kumotolu i oponsol kopio sabab PBT kapanahak surupukaraja’ mitilombus kumaa mogigion.
Dr. Joachim (koonom, gibang) guminambar pongingitanan miampai di Datuk Isnin (kolimo, gibang), Dr. Jamili (kaapat, wanan), Chong (koonom, wanan) om tongo’ nangaalap di suai i nokotindapou.
“Amu’ olimon do karaja’ mongulud sosonginan PBT nopo nga’ iso’ karaja’ di awagat, lolobi no songinan watas i aparagat miagal do Penampang.
“Poingkuro po, montok sumili songinan PBT di ogirot om koburu’, sitaf PBT kiguno no do maganu kosimbanon id kapatahakan surupukaraja’ bobos osonong,” ka disio.
Dr. Joachim minoboros, kukumaraja’ koporintaan do noondo diti mositi’ no do toririmo sumodia’ montok sumimban kopiongoi di kinosimbanon om pokikinuon di mongingigit tonggungan, miampai minoboros, nunu-nunu kootusan toi katatapan di poindalanon kiguno no do kaanu raramit poinpuli maya’ kogompitan tongo’ lansanon mogigiyon.
“Puru kounsol ngaawi’ i sinili nopo nga’ mobi do mogigion watas Penampang, yokoyu no i papapansu tonggungan di oponsol, okon nopo ko’ id kapatahakan kointalangan kumaa mogigiyon nga nogi’ mobi’ PBT id kapatahakan kopointalangan om kopoilaan id nunu nopo laang om katatapan i poindalanon do PBT,” ka disio.
Dr. Joachim (tanga’) guminambar pongingitanan miampai koinsanai Puru Kounsol Watas Penampang om tombului naalap i nokotindapou id ababayan dilo’.
Lumansan i Dr. Joachim dio’ Chong dii Robert, miampai sokodung om ponguhupan puru ngaawi’ kounsol, lansanon mogigiyon om puru karaja’ Kounsol Watas Penampang, kopomuruan Kounsol Watas Penampang kumaa Kounsol Kakadayan Penampang miampai kalantoi.
Wookon i nokotindapou nopo, Monguhup Montiri I, Komontirian Koporintaan Koiyonon om Pomuwalaian Sabah, Datuk Isnin Aliasni; Puru Lintuhun Undangan Pogun (ADUN) Kapayan, Jannie Lasimbang; Monunurat Pointatap, Komontirian Koporintaan Koiyonon om Pomuwalaian Sabah, Datuk Dr. Jamili Nais; Monunurat Pointatap, Komontirian Koburuon Labus Kakadayan, Datuk Norlijah Hj Danin; tongo’ Puru Dewan Negara, Senator John Ambrose om Senator Datuk Noraini Idris.
