KOTA KINABALU: Boyoon Montiri (KM), Datuk Seri Haji Hajiji Haji Noor minoboros, aiso’ kuasa’ miampai angkab araat kaanu mamabak Sabah gigisom po do osompuru mogigiyon.
“Sabaagi Boyoon Montiri, pointotopot oku mokimokito Sabah i koupusan tokou kotilombus osompuru, komogot, om kopotonggoi koinsanai. Agaras tokou soira’ tokou do misompuru.
“Aiso’ kuasa’ mampai angkab araat kaanu mamabak dati’ sabaagi mogigiyon Sabah. Miampai misompuru, kaanu tokou sumahap nunu nopo pogumbalan montok mamaraag kaadangon om papatsantu’ koburuon aanu monilombus do aiso’ kohimpogong,” ka disio id pason Toun Wagu 2024.
“Osudu’ oku om mongunsikou kumaa tulun ginumuna om oinsanan mononokodung i kohunung di minonokodung dahai, otumbayaan miampai di kinotulidon dahai montok popowonsoi di bobos osonong montok Sabah.
“Kanou tokou popoindisan pulitik om papataam nunu-nunu piuriasan i kapamabak nopo. Mositi’ tokou lumaang kumaa toun wagu miampai angkab, misompuru id kopogisusuaian, om pointotopot do popowonsoi di bobos osonong tumanud mandat di pinatahak do mogigiyon,” ka disio.
Miampai sokodung mantad do mogigiyon, Boyoon Montiri minoboros, Koporintaan Pogun minongulud laang di osonong id kapalantaian palan koburuon dau ilo’ nopo Hontolon Sabah Maju Jaya (SMJ).
“Id ngangaon Toun Wagu diti, norikot no timpu do momusorou kawsagu toun nakatalib om mogindad korikotan toun wagu miampai angkab om kotumbayaan. Sundung kotoguang mogisusuai kaantaban (di 2023), pointatap tokou ogirot id kopoindalanan ababayan SMJ om potilombus id waya’an. Tonggungan tokou kumaa kosunion kotilombus kotimporon om amu’ opiduo,” ka disio.
Hajiji minoboros, Bajet Sabah 2024 i pinolulus di kaawagu diti, kiginumu’ RM5.701 bilion, nopo kointalnagan tonggungan Koporintaan Poguon montok poposindak kosunion ikonomi om koburuon id Sabah.
“Momorikot tokou ogumu’ kosiwatan i aanu gunono do pogun id koinsanai siktor. Tumilombus tokou monuridong kalansaion om momogusa’ kosiwatan kopoopuan wagu montok mongimbulai ‘spin-off’ ikonomi om kosiwatan pakarajaan kumaa mogigiyon,” ka disio.
Poingkuro po, minoboros isio, oinsanan kalantaion om palan diti aiso’ rati nung piomungan inggisaman om tonggungsan toinsanan nogi’ koyuond i koposimbayan montok monigampot rikoton koburuon dilo’.
Boyoon montiri minonongkounsikou kumaa koombolutan id Kabinet, kukumaraja koporintaan om mogigiyon Sabah mantad sokodung po’ompus diolo’ om minamason Kounsikohan Toun Wagu kumaa toinsanan.
