Shahelmey Yahya (gibang) pinapatahak ponguhupan kumaa songulun mogigiyon Kampung Potuki id Putatan di songkonihab.
KOTA KINABALU: Kousinan kiginumu’ RM200 riong i notimpuunan pinapatahak kumaa koporintaan pogun di kolimpuunon minggu nakatallib kapasaga’ pangaba’ waig id Sabah kapanggor (aadas) doid suku kumoiso’ toun tiso’.
Tumanud do Utusan Malaysia, Kumoduo Boyoon Montiri, Datuk Shahelmey Yahya minoboros, koporintaan Pisompuruan nokotimpuun pinapatahak wookon mantad kousinan RM320 riong montok manalasai kobolingkahangan pangaba’ waig id pogun diti.
“Pinoilo oku soginumu’ RM200 riong nakatahak kuminaa koporintaan pogun di kolimpuunon minggu nakatalib mantad dilo’, karaja’ ngaawi’ kopoindalanan inggisaman di poinggompit papanahon id timpu oruhai,” ka disio ontok minongomi di kinopoobian RM320 riong montok manalasai kobolingkahangan pangaba’ waig id pogun diti.
Minoboros isio dilo’ ontok ababayan sopisuau mogigiyon kopihondot Krismas id Kampung Potuki, Lokkawi di songkonihab.
Id timpu miagal, kapamansaian Loji Pongusapan Waig Telibong 2 Fasa 2 nga’ nopongo om nokotimpuun poindalan. Loji diti kaanu mongimbulai waig gisom 80 riong liter sangadau (MLD).
Poingkuro po, noondo diti loji diti kopoikid gisom 40 MLD sabab no do pamasangan paip di amu’ po nopongo kopio.
“Kobolingkahangan noondo, mantad 40 MLD dilo’, borinuton tokou papalabus waig mantad walu’ gisom 13 MLD montok pomoruhang kumaa sistem. Kopoikidan waig diti maganu do timpu okuri montok papatahak waig gisom 40MLD.
Kinopoobian soginumu’ RM320 riong montok manalasai kobolingkahangan waig id pogun diti pinahabar di Luguan Montiri, Datuk Seri Anwar Ibrahim ontok kinotombuluyan karaja’ id Sabah di ko 31tw Kolimo katatalib.
Nung tumanud di palan mantad, kopoobian dilo’ gunoon montok mongingkuri’ kalawason waig aiso’ asil (NRW) nogi’ monginsonong paip om tongo’ poom waig di naraag.
Montiri Karaja’ Agayo dilo minoboros, kakasahan pangaba’ waig i naantakan pointonod pototohuri diti sasabab nodi kinoingkawason pomogunaan waig id timpu suti’ sikul om kagangahon pangaba’ lotirik id Moyog di kaawagu diti.
Ka disio, kakasahan pangaba’ lotirik dilo’ nokoowit pangaba’ waig noinggangahan kaampai id koiyonon Sepanggar.
Kohondot dilo’, Koupisan Waig Pogun Sabah (JANS) mamaso minggisom montok popoinggirot kapangabaan waig.
