Dr. Joachim (koduo, gibang) ruminamit tanda’mato mantad di Dr Abu id ababayan The 20th Asia Pacific International Honesty – Book of Records 2023.
KOTA KINABALU: Kinotulidon om tinonggungan kiguno kosili poimpahan kumaa koinsanai pitorinaan pongindopuan mooi do sosonginan pomogunon kaampai Malaysia, amu’ kotoguang nunu-nunu kaantakan susuap om kapanansalaan pongindopuan suai, ka di Kumoduo Boyoon Montiri II Sabah, Datuk Seri Dr. Joachim Gunsalam.
Kohondot dilo’, ounsikou isio kokito inggisaman i winonsoi do kotinanan miagal The Asia Pacific International Honesty – Book of Records i minanahak gaa’ kumaa lansanon pongindopuan di otulid i ka disio po nogi’ iso’ ponimpuunan kumaa mogigiyon di aadas montok toinsanan.
“Otumbayaan oku ababayan agayo i pinaanjur do kotinanan diti pointonod 2002 tumilombus popouyu, mamagatang om manahak kopongokunan mongingindapu’ mantad Koiyonon Asia Pasifik i nokosigampot naangayan osonong miampai kinotulidon sabaagi ‘parameter’ pananda’ rontob oponsol. Kalansanan ku lobi kogumu’ pongindopuan maganu bohogian id ababayan miagal diti montok popoinggayo kopongimbayatan kinotulidon om monguhup posunui kotumbayaan do kinotulidon kakal po do poimpahan bobos osonong,” ka disio ontok pinopoimagon The 20th Asia Pacific International Honesty – Book of Records 2023 kopihondot The Asia Pacific Book of Top Recognition Award id Hotel Berjaya Times Square, Kuala Lumpur di kosodop.
Dr. Joachim (koduo, wanan) pinapatahak setifikit kumaa puru puruankuasa’ APC id ababayan The 20th Asia Pacific International Honesty – Book of Records 2023.
Minanangkabayahan kumaa oinsanan nakalantoi, Dr. Joachim lumansan diolo’ kotilombus monimbuat koyuon di nakapatahak diolo’ gaa’, ilo’ nopo nga’ kinotulidon om tinonggungan.
“Pinoilo oku do The Asia Pacific International Honesty – Book of Records nakaanu kopongokunan poinpoopori sabaagi “Gaa’ Oscar Pongindopuan Sompomogunan” do China Central Television (CCTV). Kinotulidon nopo nga’ iso’ mantad potuduk oponsol montok maganu gaa’ pinotomod do totuong diti (kosodop), royohon ku inggisaman toinsanan mongindapu’ i minomoguno Kinotulidon om Tinonggungan sabaagi Potuduk Naangayan Agayo montok pomogunan korporat.
“Nokotindapou oku pipiro ababayan kinapatahakan gaa’ i minanahak pongokunan kountungan, naangayan dagangan di akawas om toi sigampot korporat sabaagi sitandod / pananda’ rontob kalantaion i tantu’ no do oponsol montok sumili mongingindapu’ di kalantoi. Nga’ gaa’ di pinatahak sodop diti poinbida’ kopio sabab manganganjur minangakun om minamaramai komponi om pongindopuan i nokopokito Kinotulidon om Tinonggungan id kopoindalanan pongindopuan diolo’. Bayahan kumaa Ponorikohon om bohogian manganganjur mantad inggisaman agao om pomusarahan di osonong id kinapatahakan gaa’ diti.
“Sabaaagi momuruan pongindopuan, yokoyu miampai ‘automatik’ om kitonggungan miampai mitilombus montok mongingkawas om mongingkawas ikonomi pomogunon sompoopori. Pongindopuan di osonong kirati do nakasanganu tokou no do lobi kogumu’ tambalut, om iti kirati pongindopuan lobi kosonong om potilombus dino kaanu tokou do mimang buru’ kumaa toguang do oinsanan. Kaanu tokou nogi’ maganu laang sabaagi duta ‘kotoronongon’ montok pomogunon sompoopori nogi’,” ka disio.
Suai ko’ mamaramai kinalantaion kotinanan pongindopuan di otulid, minoboros isio, ababayan dilo’ nga’ kosiwatan nogi’ di osonong kopio montok puru pongindopuan mogiboboros karait pongindopuan om kiharo pisokodungan toi piilangan wagu nogi’ popoinggayo pongindopuan sompoopori.
