Masidi pinapawalad Bajet Sabah 2024.
KOTA KINABALU: Koporintaan pogun kaakun montok manaak Ponguhupan Pinotomod Kousinan (BKK) soginumu’ RM2,000 kumaa oinsanan pakaraja’ koporintaan pogun Sabah kaampai pakaraja’ naamot, kuntirik om Pakakaraja’ Sambilan Tadau-Adau.
Montiri Kousinan, Datuk Seri Masidi Manjun minoboros, BKK diti bayaran do induo ilo’ nopo nga’ RM1,000 bayaran do wulan Koiso’ 2024 om RM1,000 kawagu bayaran dumontol Tadau Agayo Aidilfitri 2024.
“Kalansanan ku insentif diti kopongunsub sunduan kumaa pakakaraja’ koporintaan pogun montok tumilombus kisunduan om minggisom lobi kaparagat po montok mongingkawas sinonong kapatahakan surupukaraja’ koporintaan kumaa mogigiyon.
“Amu’ olimon, pomorintaan pogun id sahau kopomuruanan di Boyoon Montiri Datuk Seri Haji Hajiji Haji Noor okon nopo ko’ nakalantoi pinopoburu’ ikonomi pogun miampai minogowit sumuang ogumu’ kopoopuan kumaa Sabah, nga nogi’ nakalantoi pinopisompuru om minonimporon piuludan mogigiyon nogi’ minongingkawas rizab Koporintaan Pogun,” ka disio ontok pinapawalad Bajet Sabah 2024 id Lintuhun Undangan Pogun (DUN) Sabah di tadau baino’.
