Hajiji minonorikohon mitingan SEDIA id Menara Kinabalu di tadau baino’.
KOTA KINABALU: Rontob aiso’ karaja’ id Sabah nokolintuhun kuminaa 7.5 pihatus toun di nakatalib piadangon di 8.2 pihatus di 2021, sabab pinongintoban nokopokito 1,875,800 tulun id pogun dilo’ kiharo pakarajaan di 2022 nung piadangon di 1,856,500 di 2021.
Boyoon Montiri, Datuk Seri Hajiji Haji Noor minoboros, kointalangan mantad Koupisan Perangkaan Malaysia nokopokito Sabah mamaso kotoguang komogoton di osonong.
Suai mantad dilo’, inggisaman i nanu do koporintaan katalib kinopogkorolihan tomporuruol Covid-19 nokotimpuun nokopokito asil di kounsub, ka disio ontok minonorikohon mitingan kotinanan potunud Bohogian Kikuasa’ Kopoburuon Ikonomi om Kopoopuan Koridor Watas Sabah (SEDIA) doid Menara Kinabalu, do hiti, di tadau baino’.
Boyoon Montiri i po nogi’ Ponorikohon SEDIA minongunsub kotinanan dilo’ moningkanan inggisaman monginsonong koponguludan om kopoindalanan dau mooi do Palan Malaysia Ko-12 (RMK12) i noolu’ po do duo otun aanu popoindalan miampai tinonggungan om otulid.
“Iti kopiongoi di inggisaman monoibau komosikinan, mongingkawas kopulokison kogogonopan padsakaian om logistik, koburuon bakat timpu dumontol nogi’ papatantu’ koonuan padagangan graduan institusi pinsingilaan akawas nogi’ Balajaran om Pingludaan Teknikal om Vokasional (TVET),” ka disio.
Inggisaman SEDIA miagal Ababayan Kopoingkawasan Komilaan om Bakat di pinoindalan id siriba’ inggisaman ‘Transformasi Modal Insan’ montok mongingkawsa komilaan sosongulun maya’ ababayan kopoingkawasan komilaan om komilaan kawagu, koponginsonong piromutan kumaa balajaran om pingludaan maya’a ababayan koponigampotan om koponuridongan pisokodungan di lobi kosonong id pialatan pomorunan om pinsingilaan institusi, ka disio.
Mantad ninggisaman diti, Boyoon Montiri minoboros, SEDIA minongimbulai kosiwatan pakarajaan kuminaa 1,600 tuutmanud om 300 mongindapu’.
Tumanud pinongintoban, rontob kinotonudan ginaras karaja’ Sabah nokoinsawat kuminaa 70.9 pihatus di 2022 piadangon 70.4 pihatus di toun pogulu dilo’.
“SEDIA kakal kosudong sabaagi pogura’ kopoburuan ikonomi songkoiyonon. Pokionuon ku SEDIA momonsoi kosimbanon agayo id palan om kopoindalanan tongo’ projik dau montok papasarok koburuon Sabah.
“Dumontol toun 2024, SEDIA kiguno moningkanan kumaa kopoopuan om logistik, pomutanaman om ponombuluyan om poposuul kumaa ababayan ikonomi wagu kapaampai ginoris aanu monginwagu, pomogunaan tiknologi id pomutanaman, pomutayaman om ponginsadaan o wookon dilo’,” ka disio.
Boyoon Montiri minoboros, sabaagi kotinanan i nonuan tonggungan montok popoindalan palan karaja’ Koridor Kopoburuan Sabah (SDC 2.0), SEDIA mositi’ popoindalan inggisaman om projik kosudong i kopongimbayat kopoopuan kikosiwatan, mongimbulai lobi kogumu’ pakarajaan, om mongingkawas rontob koposion mogigiyon Sabah.
“Mimang kikaantaban montok mongulud om popoindalan sosonginan kotinanan kosuul no id sunduk kapatahakan surupukaraja’, nga’ SEDIA nokopokito no do nakapanau ilo’ miampai otulid om kitonggungan. SEDIA noonuan setifikit ‘bil bersih’ solinaid 13 toun otuntud di Luguan Audit Negara. Bayahan,” ka disio.
Hajiji minonongkounsikou nogi kumaa Komontirian Ikonomi Pisompuruan tu’ minanahak kotumbayaan kumaa SEDIA montok popoindalan pipiro inggisaman om projik id Sabah, wookon do projik kapadakatan sistem solar montok linimput koporintaan, projik kapamaraladan Dodopiton Kontena Suok Sepanggar om monginsonong talan sumuang kumaa koiyonon atag Imigrisin, Kositum, Kuarantin om Koumoligan (ICQS) Serudong id Kalabakan.
Boyoon Montiri minanangkabayahan kumaa SEDIA tu’ pinili’ sabaagi mongungulud om mamamalan Pitimungan Limunduk Rikoton Kopoburuan Po’ompus (SDG) Malaysia montok Watas Sabah toun tiso’.
Minoboros isio, iti kopongingkawas kokitonan Komontirian Ikonomi sabaagi tingkananon SDG om palan karaja’ sandad posorili’, sosial om kopoindalanan (ESG) pogun.
Nokotindapou nogi’ id mitingan dilo’ i Monunurat Koporintaan Pogun, Datuk Seri Sr. Haji Safar Untong; Luguan Eksekutif SEDIA, Dautk Seri Haji Hashim Paijan om Luyar Agayo Pogun, Datuk Nor Asiah Mohd. Yusof.
