Steve Johnny Mositun
KOTA KINABALU: Sabah pikikiro doti’ kotoguang mogisusuai kobolingkahangan nung mogigidu’ mamasok Palestin owiton sumuang doid om poiyonon id pogun diti, ka di Kumoduo Presiden Kelab Komuniti Sayang Sabah, Steve Johnny Mositun.
Ka disio, iti kaampai no amu’ kaadangon demografi, kobolingkahangan kumaa intodonon kotulunan, kokusutan koubasanan om ugama’, ginumu’ pakakaraja’ songkosuayan, kobolingkahangan koumoligan, koingkawason winagat surupukaraja’ ginumuan om winagat ikonomi.
Mantad dilo’, amu’ isio kaakun di atag montok monimbang pomoromitan mogigidu’ mamasok Palestin, lolobi no nung poiyonon yolo’ id Wilayah Sabah toi Sarawak.
Steve i po nogi’ Ponorikohon Kounsol Komulakan Koisaan Koubasanan KadazanDusun (KDCA) minoboros, kopomoromitan mogigidu’ pikikiro doti’ do kopongimbulai winagat tonggungan ikonomi timpu oniba’ pogulu diolo’ pasarabakon doid mogigiyon om pidagangan pakarajaan nokoiyonon.
“Suai mantad dilo’, kotongoban kopohompit amu’ kaadangon pulitik i pikikiro doti’ do koimbulai nung kosuangon mogigidu’ amu’ otorina’ miampai poinsonong, lolobi no nung haro pisuayan pomusarahan doid nayatan mogigiyon kapaampai hal dilo’.
“Pomoromitan mogigidu’ nga’ intangan do kapasaga’ moninong amu’ kaadangon koubasanan om kokusutan id mogigiyon, nogi’ monginwagat intodonon koporintaan kaampai no kogogonopan infrastruktur om surupukaraja’ koporintaan,” ka disio id iso’ kointalangan.
“Mantad sunduk kotulunan, toririmo dati’ opoduli’ om monguhup mantad ginaras di haro nogi’ toririmo monokodung nunu i osonong mantad sundung kotulunan poinpuli.
“Nga’, mamaramit sumuang kumaa Wilayah Sabah komoyon do amu’ kosudong, miampai maganu kokiraan mogisusuai kaantaban i pikikiro doti’ do koimbulai. Iti kaampai no momoduli’ rolou rayat Wilayah Sabah, lolobi no tongo’ komulakan i manahak mogisusuai pomusarahan di waya’ pisangadan om kokusutan kisinjata’ id Gaza,” ka disio kawagu.
Habar karait hal diti nosili kotongoban, lolobi no miampai kinotu’ habar sokodung mantad Kounsol Pirundingan Kotinanan Islam Malaysia (MAPIM) i pinopoilo do, Malaysia amu’ kaanu mongilag kosuangon mogigidu’ mamasok Palestin kumaa pomogunan diti.
Pogulu diti, Kotinanan Gagasan NGO Dayak Sarawak minonokodung ningkakaton di Montiri Karaja Agayo, Datuk Seri Alexander Nanta Linggi i minagada’ nunu-nunu pomusarahan pomoromitan mogigidu’ Palestin kumaa Wilayah Sarawak. Parti Solidariti Tanah Airku (STAR) maya’ kinotu’ habar mantad di Ponowoli Kumoduo Presiden, Datuk Stephen Teo pinopointalang do amu’ monokodung pomoromitan mogigidu’ mamasok Palestin, sabab kobolingkahangan kinorubpuon mogigiyon modidikot songkosuayan aiso’ kasagaan i kakal amu’ nasalasai id Wilayah Sabah.
