Hajiji miampai tongo’ bagas Boyoon Montiri, Tan Sri Musa Haji Aman, Tan Sri Joseph Pairin Kitingan om Datuk Seri Yong Teck Lee i tuminindapou Pitimungan Agayo Tounan 2023 Gagasan Rakyat doid SICC, Kota Kinabalu, di tadau baino’.
KOTA KINABALU: Boyoon Montiri, Datuk Seri Hajiji Haji Noor lumansan kinaantakan oitom pinongumbalan sumolod kuasa’ koporintaan kolimpuunon toun diti, amu’ nodi aantakan kawagu montok no do koburuon om komogoton pogun.
“Kakal poinsorou tokou toinsanan i iso’ pinongumbalan ‘kudeta’ pulitik di kolimpuunon toun diti di wookon lansanon toi tinimungan, i po nogi’ tambalut tokou sondiri’.
“Mantad no do pinongumbalan dilo’, oinsanan karaja’ kopomorintaan pogun nakasou do toruhai,” ka disio id Boboroson Impuunon sabaagi Presiden Parti Gagasan Rakyat sabah (Gagasan Rakyat) id Pitimungan Agayo kumoinsan parti dilo’ doid Longkod Konvensyen Sompomogunan Sabah (SICC), do hiti di tadau baino’.
Hajiji minoboros, koyuon di maso dilo’ agagut no kopio om koporintaan pogun oruhai no do okimai nogi’ atagakan kosudongan montok monilombus pomorintaan om kuasa’ momorinta’.
“Rayat notingkau. Tumongob yolo’ nung aantakan kawagu Pomilian Agayo Pogun. Iso’ koyuon di amu’ apatut aantakan sabab kopongimbulai ilo’ do amu’ kaadangon pulitik.
“Nga’, mantad sokodung tongo’ koombolutan i pogulu dilo’ ponokisahap, ilo’ nopo nga’ Pakatan Harapan Sabah, koporintaan i tinoruntud do GRS diti naanu minanampasi om potilombus minongigit kuasa’ koporintaan.
“Pounsikou kumaa tongo’ tambalut mantad PH kaampai no pipiro Puru Lintuhun Undangan Pogun (ADUN) mantad BN/UMNO i pointatap minonokodung om minonguhup Koporintaan GRS, i nokoposili koporintaan pogun babaino’ diti sabaagi Koporintaan GRS-PH Plus,” ka disio.
Miampai lumansan rayat momuhondom kawagu kinaantakan dilo’ montok papatantu’ koporintaan kotilombus ogirot momuruan pogun.
Ka disio, kaantakan dilo’ kapasaga’ “dati’ koilo isai tambalut om sangod, om lobi oponsol kotutun tokou ginawo tambalut ouli’.”
Hajiji pinoposotol do laang papaatu’ koporintaan demokratik pinili’ rayat miampai pinsimbayagan om kaagal dilo’, nopo nga’ iso’ laang di kopoikum om aiso’ tinonggungan.
Hinulit disio o koponsolon Gagasan Rakyat do inggirotan sabaagi i tisoiso’ no impohon kopoburuan, om minongomi parti dilo’ sabaagi ‘walai dati i kiguno tamangan do toinsanan.
“Walai dati’, yati’ no sanganu. Walai dati’, yati no i papatantu’ do koyuyuon dilo’. Walai dati’, yati’ no i manaong,” ka disio.
Hajiji pinoposorou noig’ puru parti do kumaraja’ agaras montok monoguang pomilian agayo pogun do soiraira’ timpu.
“Sundung pia kakal tokou kiharo timpu do duo po toun, nga’ isai nokoilo do kopikikiraan pomilian agayo tokou posopungon?,” ka disio pinoposotol.
Montok dilo’, ka disio, momuruan parti id oinsanan nayatan apatut tilombuson monginggirot om amu’ kasaga’ kalawong, nga’ tumilombus kumaraja’ montok parti, mogigiyon om pogun.
Ka disio, pointonod tolu toun pototohuri diti, koporintaan pinopointutun mogisusuai inggisaman wagu montok monguhup oinsanan mogigiyon suai ko’ monilombus om monginsonong inggisaman di poinharo mantad.
Minaganu piipiro poiradan id kaganaan balajaran, kotundunan, pomuwalaian om kopongobian konosipan do koonduan.
