Hajiji tinanud di Kumoduo Presiden Parti, Datuk Seri Panglima Masidi Manjun, Monunurat Agayo, Datuk Mohd Razali Razi om Luguan Kopointalangan, Datuk Nizam Abu Bakar Titingan pinopoimpuun loyou poinbida’ parti “Gagasan Rakyat Rumah Kita” id Pitimungan Agayo Tounan 2023 Gagasan Rakyat id SICC, Kota Kinabalu, do hiti di tadau baino’.
KOTA KINABALU: Boyoon Montiri, Datuk Seri Hajiji Haji Noor minagangat puru Parti Gagasan Rakyat Sabah (Gagasan Rakyat) tumilombus mingkakat doid kopoburuan mongobi’ konosipan rayat pogun diti.
Presiden Gagasan Rakyat dilo’ minomohulit nogi’ do tonggungan montok tumilombus mingkakat id kopoburuan maganu tongo’ kopotutan Sabah miagal poinsurat id Koundangan Malaysia.
Id timpu miagal, puru parti pinokianu mungkakat monotk monginggirot kukumaraja’ om monginggaras pisompuruan, montok no papatantu’ Gagasan Rakyat kotilombus ouli’ om ogirot.
“Mungkakat gumaga’ koinsanai totondos, pomiodu om ponondos, mungkakat popoudong kotopotan om kaadangon, mungkakat montok popoburu’ tongo kopotutan tokou om mungkakat montok mongobi’ ugama’, tana’ kinosusuon om pogun koupusan,” ka disio id Boboroson Impuunon doid Pitimungan Agayo Tounan kumoinsan Gagasan Rakyat id Longkod Konvensyen Sompomogunan Sabah (SICC) di tadau baino’.
Id boboroson disio i ki’uhu ‘Merealisasi Aspirasi Rakyat’ dilo’, Hajiji minoboros, Gagasan Rakyat sabaagi parti nokoiyonon monimbuat sunduan Pisompuruan Malaysia mimpau do angkab kabansaan.
Hajiji sinuau dilo tongo’ lansanon om puru parti id kinorikotan disio doid Pitimungan Agayo Tounan 2023 Gagasan Rakyat id SICC, Kota Kinabalu, do hiti di tadau baino’.
“Papapanau tokou tonggungan di agayo id pulitik kabansaan montok monimbuat do ababayan kopoburuan pogun om pomogunon.
“Kakaton tokou kopoburuan pogun miagal di poinsuang id Pibatosan Malaysia 1063 (MA63), Koundangan Pisompuruan Malaysia om nombo-nombo kopotutan Sabah di poinggompit,” ka disio.
Kohondot dilo’, ka disio, Gagasan Rakyat pinopoiliu tolu impohon poburuon – ‘Stabil Politik’, ‘Makmur Negeri’ om ‘Jaminan Kesejahteraan’ – i oilaan toniba’ dau SMJ (Sabah Maju Jaya).
Tumanud disio, kinorikotan Gagasan Rakyat id kaganaan pulitik kiguno kopio sabab koponginggirot ilo’ do Gabungan Rakyat Sabah (GRS) miampai parti komponen suai.
Ka disio, kaadangon pulitik id Sabah oponsol kopio montok papatantu’ koporintaan pogun kaanu moningkanan poinponu’ id inggisaman popoburu’ pogun.
“Kosimbanon koporintaan kaampai pialanan Boyoon Montiri di asaru’ kopikiikiro doti’ katatapan om kooturan koporintaan pogulu dilo’ amu’ aanu monilombus, toi poingkuro po nga’ kosimban.
“Kopoindalanan popoburu’ sosonginan pogun momoguno iso’ timpu di poinpatut suai ko’ tonggungan nogi’ angkab pointotopot koporintaan montok momorikot tuduan sumili pogun lobi koburu’.
“Sabah momoguno angkab pulitik montok koburu’ do osikap. Kunci nopo nga’ kaadangon. Otumbayaan oku, mantad nod o kaadangon, do kaanu Sabah poburuon,” ka disio.
Hajiji miampai bagas Boyoon Montiri, Tan Sri Musa Haji Aman om Tan Sri Joseph Pairin Kitingan nogi’ presiden, momuruan om lansanon parti komponen Gabungan Rakyat sabah (GRS) om Pakatan Harapan Sabah i tuminindapou Pitimungan Agayo Tounan 2023 Gagasan Rakyat id SICC, Kota Kinabalu, do hiti di tadau baino’.
Hajiji minoboros, impohon koduo montok popotunda’ pogun mimpau kumaa palan kopotundaan pogun i pinosodia’ maya’ Hontolon SMJ, i pinoimpuun di ko 29tw Kotolu 2021d ilo’ nookowit Sabah id waya’an di kohunung montok koburu’.
Pinointalang disio pipiro potuduk ikonomi nokopokito tinonggungan kopomuruanan Koporintaan Pogun i binuruan do Gagasan Rakyat, GRS om tambalut parti komponen PH Plus. Iti mitilombus kopokito waya’ di osonong kopio kumaa kopoindalanan Hontolon SMJ.
Ka disio, kinoinsawaton asil Koporintaan Pogun duo toun otuntud ilo’ nopo nga’ RM5.449 bilion di toun 2021 om RM6.96 bilion di toun 2022 nokoposurat susuyan kahandaman sabaagi nopuhu asil bobos akawas pointonod kinopomorintaan sondiri.
