Dr. Joachim (kotolu, gibang) miampai di Soen Tan (kaapat, gibang) om VIP di suai.
KOTA KINABALU: Momomonsoi roti kiumur 27 toun mantad Kota Kinabalu, Soen Tan Sieu Ni gina’an sabaagi bontugan Miss Pearl International Beauty Pageant 2023 id panantaban tohuri pialaan ‘ratu cantik’ dilo’ doid Lintuhun Hakka do hiti di kosodop.
Timbang bontugan nopo i Diamond Pang Nai Ee, 21, karani mija toguang om puru ‘strategi media sosial’ id Kota Kinabalu, om i Jelsi Jass Ellyvera James, 22, i poingkaraja’ sondiri’ mantad Beluran, id koiyonon kotolu.
Ababayan dilo’ pinohimagon di Kumoduo Boyoon Montiri II, Datuk Seri Dr. Joachim Gunsalam i minoboros, ababayan miagal pialaan ratu cantik kiguno sokodungon sabab pasanganu ilo’ ogumu’ koundaran i lobi ko’ mantad ‘estetika’ nopo toomod.
Minoboros isio, pialaan ratu cantik kikosiwatan montok mongingkawas ponombuluyan om potilombus dino kapasarok ikonomi.
Soen Tan (tanga’) miampai di Diamond (koduo, wanan) om Jelsi (koduo gibang).
Pialaan ratu cantik po nogi’ kapanahak kosiwatan kumaa tongo’ tutumanud tongolumis do popokito bakat diolo’ nogi’ manahak kotumbayaan kumaa diolo’ do monilombus kororohian om kopomuruanan id nunu nopo kaganaan di ampayaton, ka disio kawagu.
“Pialaan ratu cantik kiharo ginoris montok popoinsawat om papagaras tulun, popokito bakat diolo’ om koponguhup kumaa koburuon kinoulunan diolo’.
“Suai ko ilo’, ilo’ po nogi’ kosiwatan do komponi pongindopuan montok popokirot piromutan pongindopuan diolo’ lolobi no mantad sunduk fesyen, produk ponginlumis om susuai po.
“Mantad dilo’, otumbayaan oku do oponsol montok tumilombus monokodung om popointutun pialaan ratu cantik id Malaysia, id kopongimbulayan timpu dumontol lobi kanawau om olumis monotk pogun tokou,” ka di Dr. Joachim, po nogi’ Montiri Koporintaan Koiyonon om Pomuwalaian.
Nokotindapou nogi’, Monunurat Pulitik kumaa Boyoon Montiri Sabah, Datuk Roland Chia; Manganganjur Miss Pearl International Beauty Pageant 2023 om Luguan Upisor Eksekutif Kimora Entertainment Sdn. Bhd., Ken Wong; Miss Pearl Ambassadors, kaampai no i popokito fesyen Star Cheng, Potunud Tinimungan Orange, Serene Tan om Luguan Upisor Eksekutif Music Hive, Dr. Janet Lee.
