Presiden PBS Datuk Seri Dr. Maximus Ongkili minamaramit tandamato mantad di Monontuduk Perdana PBS Tan Sri Joseph Pairin Kitingan id Pitimungan Mongongobi’ PBS ko-38 i nokoindalan doid lintuhun Hongkod Koisaan KDCA, Penampang di tadau baino’.
PENAMPANG: Parti Bersatu Sabah (PBS) noondo diti kasaga’ maganu susumikul univositi om kolej sabaagi puru soira’ Pitimungan Mongongobi’ Tounon ko-38 parti di tadau baino’ pinopolulus atag montok mongidu’ iso’ katatapan id koundangan parti.
Kinopomisokan katatapan i mogodu mahasiswi univositi om kolej sumompuru parti dilo’ kopiongoi di ponimbanan Akta Univositi om Kolej Univositi 1971 (Akta Univositi om Kolej Univositi 1971 – AUKU) i minanahak kosimbayanan kumaa suusmikul id pipiro hal, nopo nga’ wookon apat atag pinogibabarasan om pinolulus di 710 mongongobi’ i tuminindapou pitimungan mongongobi’.
Pinolulus nogi’ diolo’ atag mongolon Pitimungan Mongongobi’ Tounan kumaa Pitimungan Mongongobi’ Tri-Tounan, kirati pitimungan dilo’ do babaino’ pohoroon tikid tolu toun do insan.
Presiden PBS Datuk Seri Dr. Maximus Ongkili pinapatahak tandamato mantad di Monontuduk Perdana PBS Tan Sri Joseph Pairin Kitingan id Pitimungan Mongongobi’ PBS ko-38 i nokoindalan doid lintuhun Hongkod Koisaan KDCA, Penampang di tadau baino’.
Pinolulus nogi’ atag poposuang artikel montok papaamung om popoimagon nuludan Kounsol Monontuduk Perdana kumaa id Koundangan Parti. Kounsol Monontuduk Perdana tinuridong di 12tw Kohopod om Iso’ 2018.
Atag kumaapat i pinolulus nopo nga’ pinoposuang Tinimungan Komulakan om Sukod wagu toi Belia (BM) / Beliawanis Wing (Boros Inggilis) kuminaa id koundangan parti. Ilo’ di timpuunon nopo nga’ pinointutunan sabaagi ‘gerakan’ di ko 15tw Kohopod om Iso’ 2019 sabaagi simbar kumaa katatapan koporintaan montok pinopoinsiriba’ rontob umur mongundi’ mantad 21 kuminaa 18 toun.
