Dr. Joachim (toguang, koduo gibang), Monunurat Agayo PBS, Datuk Julita Majungki (kotolu, gibang), Luguan Koonduan PBS, Malianah Ugau (kaapat, gibang) om i Luguan Komulakan PBS, Christopher Mandut (gibang), pinapalahat slogan kointutunan parti ‘BERSATU’.
PENAMPANG: Tinimungan Komulakan om Koonduan Parti Bersatu Sabah (PBS) kiguno kobulun papalangas di hal ngaawi’ maso-maso om nogi’ manahak pomusarahan di wagu om osonong, ka di Kumoduo Presiden PBS, Datuk Seri Dr. Joachim Gunsalam.
“Poingkuro po, id kopolombusan hal di tongoponsol, kiguno tokou nogi’ do mamarati om mongilo hal dilo’ miampai poinralom mooi do amu’ kasala’ kointalangan di nunu i porikoton,” ka disio ontok pinopoimagon Pitimungan Mongongobi Komulakan om Koonduan PBS, Kongres PBS Ko-38 id Lintuhun Hongkod Koisaan, do hiti di konihab.
Dr. Joachim minoboros, kinolumison toi kosuulon komulakan om kogumuan mantad Koonduan PBS nopo nga’ ogumu’ mantad diolo’ i kitoilaan IT om komilo momoguno tiknologi digital di wagu.
Ka disio kawagu, timpu babaino’ diti momoguno toilaan om kabaahan momoguno tiknologi digital toi IT okon nopo ko’ montok karaja’ tikid tadau nga nogi’ papatayad kointalangan kumaa kombolutan diolo’ do hinombo nopo.
“Binsoroho’ no nung pasanganu tokou tinimungan di 20 tulun, om tikid 20 diti haro 5 tinimungan di suai, id insan no ‘klik’ nga’ kapatayad tokou kointalangan kumaa 100 tulun, om otumbayaan oku pasanganu kou do lobi mantad iso’ ‘chat group’ i aanu tokou patahakan toi ‘foward’ pason do tikid minit. Iti no sindata’ di bobos osonong montok papatayad tongo’ pomusarahan kumaa tulun ginumuan om puru ngaawi’ dati.
“Kohondot dilo’, atagon ku yati’ ngawi’ nga’ lobi kumaa Komulakan om Koonduan do popoinggayo parti tokou,” ka disio.
Mamantang sinusuyan om kinopoburuan PBS
Minagangat tongo’ mongongobi’ mamarati sinusuyan om kinopoburuan PBS, Dr. Joachim minoboros, PBS tinuridong id nimpohon di ogirot om binuruan di lalansanon i pantangon isio nopo nga’ i Tan Sri Huguan Siou Jospeh Pairin Kitingan di itmpu pogulu om noondo diti i Datuk Seri Dr. Maximus Ongkili.
“Okon nopo ko’ pantangon nga’ yolo’ dilo’ nopo, lansanon i kiguno silihon turianan om ombitanan tokou sbab pasanganu yolo’ do kopomuruanan di akawas miagal do tinonggungan, kinotoboion, kinogiroton, ponginsomokan di au’ poindala’ om kinobulunon momuruan sundung id koyuon di kikaantaban mantad mogisuai sunduk.
“Kiguno tokou minsingilo om mamantang susuyan laid suai ko’ mamarati di tuduan do poburuon tokou,” ka disio.
Ka disio, id timpu PBS solinaid 38 toun, PBS nokotoguang mogisusuai pogumbalan om kaantaban.
Pinointalang diiso, PBS nakawaya’ pipiro timpu id 38 toun pinopoburu’ do kotumbayaan pulitik dau ilo’ nopo;
• Kumoiso’ nopo nga’ timpu kinalantaion ilo’ nokotimpuun di pinonuridongan hinombo do oruhai mantad sontoun tinuridong, PBS nakalantoi PRN maya’ ‘simple majoriti’. Nga’ mantad no do amu’ kaadangon pulitik Boyoon Montiri ontok idlo’ (Presiden Parti PBS) nasansagan minonunggar Lintuhun Undangan Pogun om pinapaharo insan po PRN.
• Timpu koduo nopo nga’ timpu 1986 gisom 1991 i aanu komoyon naangayan osonong PBS.
• Potilombus dino timpu kumotolu nopo nga’ ontok kinorotuan i nokotimpuun di toun 1994 di maso ogumu’ lansanon PBS tuminindak minonongkiad di Pairin om i Maximus Ongkili. Di maso dilo’, PBS oruhai natagak om nokolobong nga’ sunduan kopoburuan duo lansanon tagayo tokou miampai sokodung Koonduan, Komulakan om siriba’, PBS nakaanu minasi om kotilombus ogirot.
• Fasa kumaapat nopo nokotimpuun di toun 2002, hinombo do PBS rinamit suminuang kawagu id koporintaan Barisan Nasional (BN) montok papaadang pulitik nokoiyonon om minoningkod pogisosowolianan Boyoon Montiri Sabah. Pointonod idlo’, PBS minimpuun miningkakat om tuminungad kawagu; nakaanu tokou koiyonon id ginawo rayat Sabah do insan po.
“Noondo diti, yati’ id itmpu pogilombus ilo’ nopo nga’ paapgaras om monilombus pinoburu’ i kakal amu’ nokootus.
“Noondo po nogi’ do timpu kosimbanon om kopoinggirotan tongo’ lalansanon tumungkus. Mantad dilo’ angatan ku yati’ ngaawi’ Komulakan om Koonduan do mungkakat om oinsanan dati’ sumili somboogian mantad koungkakaton diti. Kanou tokou no poposindak sunduak 1985, hinombo do oinsanan Misompuru, amu’ mimud mosikin om opuawang, amu’ mimud pangkat om nindikohon nga’ ingkakat no montok iso’ pogun, iso’ tuduan om iso’ poburuon – ilo’ nopo nga’ kopoburuan Parti Bersatu Sabah!
Id timpu miagal, kiguno tokou do poingukab kumaa kosimbanon. Pomogunan pulitik kotilombus kosimban, om yati’ kiguno sumimban mooi do kotilombus kosudong om kiginoris tumopong. Kanou tokou no sumili ejen kosimbanon i mogowit PBS kumaa rikoton di lobi koburu’ om poinpuli.
Way forward, kopomuruanan, kopoimulokan parti
Dr. Joachim minongunsub nogi’ oinsanan lansanon om puru parti do sumodia’ om momongo tinan montok monowoli kopomuruanan id parti, soira’ do pokionuon.
“Nokosodia’ no toi Komulakan om Koonduan?
“Otumbayaan oku kakal ogumu’ po i orohian parti PBS diti. Nga’ i kiguno nopo lansanon di opinogot om otoboi nogi’ asangal om kitonggungan montok momuruan. Iti no i imbulayon tokou mantad dokoyu toinsanan mimpuun tadau baino’. Otumbayaan oku sabab ogumu’ nogi’ mantad dokoyu i kisinikulan akawas, kitoilaan om sopiagal dilo. Kiguno nopo do asaon om ruhangan montok momuruan parti mooi do PBS kosili songinan parti koondosan tokou toinsanan.
“Ponuhuan di Presiden PBS montok popomulok PBS okon ko’ binsorou tomod nopo, nga’ pomusarahan i kiguno silihon do katapatan. Montok kopoilaan toinsanan, pomusarahan popoimulok parti okon nopo ko’ kapaampai di lansanon tongomulok, nga nogi’ kopohimpit di kopomuruanan oulud, karalano’ kimpin wagu om pomorugaan ‘platform’ digital. Oniba’ boros, kiguno tokou sumodia’ montok sumiman tumanud kosimbanon timpu,” ka disio.
Dr. Joachim i po nogi’ Kumoduo Boyoon Montiri II minoboros, PBS nga’ momoguno nogi’ lobi po kogumu’ komulakan om sukod wagu popoindalan kopoburuan miampai PBS.
“Momoguno tokou lobi kogumu lansanon tumungkus di omulok, pointotopot om kitonggungan.
“Kiguno tokou do kikomilaan om aparagat mogowit puru ngaawi’ wagu kosuul no id nayatan sukod wagu. Kiguno yolo’ kotutun do PBS – sabab amu’ kotutun nga’ amu’ olisi. Kiguno tokou haro kokitanan di wagu – PBS nopo nga’ parti i haro prinsip om okodou miampai kopoburuan di miagal,” ka disio.
Pinointalang disio, wookon poburuon PBS nopo nga’;
a) PBS nopo nga’ parti orukut tinaru’
b) Popoburu’ tongo’ kopotutan Sabah (MA63) mantad kolimpuunon;
c) Mononsog panalasaian projik IC’
d) PBS popoburu’ kooturan ‘anti lompat 3; om
e) PBS poposuul koumoligan piwolitan om koburuon ikonomi nokoiyonon.
