Dr. Joachim Gunsalam
KOTA KINABALU: Koporintaan Pogun kaakun di SOP kaawagu pamakaian tokop wuros om koponguludan kes positif Covid-19 kopiongoi di kotontuan Komontirian Kolidasan Malaysia (KKM).
Montiri Mongungulud Covid-19 Sabah, Datuk Seri Dr. Joachim Gunsalam minoboros, SOP pamakaian tokop wuros i pogulu dilo’ patatapon kumaa susumakit Covid-19, soira’ id suang padsakaian ginumuan (suai ko’ kapal tumulud) om kogogonopan kolidasan, nulud kaawagu tumanud kotontuan id siriba’ poinggirotkuasa’ mimpuun ko 5tw Koturu’ 2023; ilo’ nopo:
Sosongulun pokionuon monontokop wuros montok:
i. Kes positif Covid-19; om
ii. Soira’ id kogogonopan kolidasan tumanud nubasanan. Kapanamangan om Kopongilagan Korolihan soira’ tumoguang toi monompuan susumakit.
Pamakaian tokop wuros pounsubon kopio tumanud kopogintongan sondiri montok:
i. Tulun haro korolihon akawas miagal tulun nolohing, sosongulun kitoruol awagat, tulun miampai ‘imuniti’ osiriba’ toi tina’ monontian lolobi no soira’ id koiyonon ososok om hinombo amu’ songkuro kosonong pomutongusan;
ii. Tulun i kitanda’ ‘respiratori’ montok mongilag korolihan kumaa tulun suai; om
iii. Soira’ id surupukaraja’ padsakaian ginumuan miagal bas, koritapi, kapal tumulud, teksi kaampai no surupukaraja’ e-hailing, bas/van pakakaraja’ om bas/van sikul.
Kooturan koponompipian kes pinoimagon Covid-19:
a) Ponuhuan koponimpipian kes pinoimagon Covid-19 tilombuson miampai timpu ninibaan mantad turu’ tadau kumaa limo tadau mimpuun ‘onset’ tanda’ kumolimpuunon. Iti nopo nga’ tumanud pinogintongan i koboros do ‘infektiviti’ kes Covid-19 akawas ontok limo tadau kumolimpuunon mantad onset tanda’ miampai ‘viral load’ i akawas id timpu dilo’. Poinggirotkuasa’ ilo’ mimpuun ko 5tw Koturu’ 2023.
Kohondot kopongoputan kopoimaganan watas kinoiyonon korolihon, Dr. Joachim minoboros, sundung pogintongan koyuyuon maso-maso Covid-19 nopo nga’ id gontob di amu’ kopotongob om surupukaraja’ kolidasan amu’ oinwagatan di koyuon Covid-19, koyuon Watas Kinoiyonon Kinorolihon id Malaysia i nopupusan di ko 30tw Koonom 2023 noputan montok timpu onom po wulan, ilo’ nopo gisom ko 31tw Kohopod om Duo 2023.
“Ilo’ montok papasaga’ kopogirotankuasa’ pipiro katatapan id suang Kooturan-kooturan Pongilagan om Panamangan Tomporuruol Mogkoroliu (Laang-laang id Suang Watas Koiyonon Kinorolihon) (Palan Ponondulian Pogun) (Fasa Kosimbanon kumaa Endemik) 2022 (P.U.(A) 872022) i winonsoi mantad kuasa’ Montiri id siriba’ subseksyen 11(2) Akta Pongilagan om Panamangan Tomporuruol Mogkoroliu 1988 [Akta342].
“Pongoputan kopoimaganan Malaysia sabaagi “Watas Koiyonon Korolihon” nga’ kakal gunoon sabab no do haro kopikikiraan korikotan varian om subvarian wagu Virus SARS-CoV-2 id Malaysia. Suai ko ilo’, pitimungan ogumu’ tulun i pikikiro aantakan ontok kapamaramaian Tadau Raya Aidiladha om nogi’ Pomilian Agayo Pogun, pikikiro koowit kumaa koingkawason kes om koponginwagat sistem surupukaraja’ kolidasan Koporintaan nung laang panamangan om pongilagan amu’ no poindalanon poinponu’,” ka disio id iso’ kointalangan di tadau baino’.
Sabah nokoposurat 78 kes wagu Covid-19 di minggu nakatalib (25tw Koonom – 1tw Koonom), nokoinsiriba’ nung piadangon di 110 kes minggu pogulu dilo’ (18tw Koonom-24tw Koonom).
