Dr. Joachim (tanga’) guminambar miampai puru PBS Bohogian N5 Matrunggong, id Mitingan Agayo Tohunan di kaawagu diti.
Dr. Joachim mamaso manahak boboroson.
MATUNGGONG: Kumoduo Presiden Parti Bersatu Sabah (PBS), Dr. Joachim Gunsalam mokianu PBS Bohogian Matunggong potimporon kisunduan, misompuru om tumungag kawagu miampai karalano’ wagu montok monoguang pomilian agayo do obontol.
Pinoposorou isio kukumaraja’ bohogian mooi tumilombus misompuru montok papatantu’ pisokodungan di osonong sompipi’ diolo’ id inggisaman lumantoi kawagu tindikohon Parlimen Kota Marudu om momusus do tindikohon Lintuhun Koundangan Pogun (DUN) di haro mantad.
“Pisompuruan id kopomoruanan om nayatan puru oponsol kopio montok kalantaion id pomilian agayo om kosili somboogian mantad koporintaan di momorinta’,” ka disio ontok pinopoimagon Mitingan Agayo Tohunan PBS Bohogian Matunggong id Lintuhun Mini KDCA Matunggong, do hiti di tadau Ko’onom.
Dr. Joachim po nogi’ Kumoduo Boyoon Montiri nga’ minongunsub kogompitan lobi kogumu’ sukod wagu id suang parti.
“Tonggungan lansanon nokopogulu pantangon om id timpu miagal magalap tokou nogi’ do kogompitan lalansanon omulok montok monilombus kopomuruanan di osonong doid PBS.
Dr. Joachim (kotolu, gibang) minonuntung tagung montok pinopoindalan kopoimaganan Mitingan Agayo Tohunan PBS Bohogian N5 Matunggong.
“Sukod wagu kiguno minsingilo tumanud di ralan kopomuruanan i poinggonsuhatan nga’ kiniigitan om otiu’ id piombolutan doid kopoburuan,” ka disio, i minagalap do sukod wagu i kisinikulan do sumompuru pulitik maya’ PBS.
Suai mantad dilo’, Dr. Joachim pinoposotol koponsolon pisokodungan osonong miampai koombolutan parti id Gabungan Rakyat Sabah (GRS) om koporintaan pgoun mooi do kaanu yolo’ umampai papalantoi palan om rikoton id kopoburuan Sabah.
Dr. Joachim minanangkabayahan kumaa PBS Bohogian N5 Matunggong tu’ nokopoindalan AGM do toun diti potilombus dino nosili bohogian kumoiso’ i pinapaharo AGM id poliliput Sabah i koindalan do po’ompus wulan diti gisom koompokon wulan Kolimo.
Ka disio, pitimungan miagal diti kopohondom do bohogian di ginaras pasanganu.
“Pinoilo oku do haro 133 raan PBS id poliliput watas DUN Matunggong om 109 raan nakapaharo mitingan agayo tohunan. Sundung tintob kosompuruan di ogumu’ okon i ko’ tisoiso’ no kapatantu’ kalantaion, nga’ otumbayaan tokou do kouhup ilo’ poposindak sunduan PBS Matunggong do tumungag om mongulud karalano’ wagu montok monoguang pomilian agayo dumontol. Papalantoi kawagu watas Parlimen Kota Marudu pia nga’ okon ko’ iso’ i au’ osigampot,” ka di Dr. Joachim i po nogi’ Montiri Koporintaan Koiyonon om Pomuwalaian.
