KOTA KINABALU: Tolu projik ‘sakit’ id siriba’ Komontirian Kolidasan i haro id Sabah kotoguang koinloidan pialatan 11 gisom 45 pihatus.
Tumanud Utusan Malaysia, Montiri Kolidasan, Dr. Zaliha Mustafa minoboros, tolu projik sakit dilo’ kaampai no Walai Pongubatan (Hospital) Papar, Hospital Beaufort om Kolinik Kolidasan Sikuati, Kudat.
Minoboros isio, tumanud kinoburuon kaawagu, koponuridongan Hospital Papar nokotoguang kinoloidon kikiro tolu wulan (11.72 pihatus) naamot, Hospital Beaufort nokotoguang kinoinloidan solinaid sontoun onom wulan (45.97 pihatus) om Kolinik Kolidasan Sikuati nokotoguang kinoinloidon somok siam wulan.
Ka disio, tolu projik dilo’ wookon di 12 projik sakit id siriba’ Komontirian Kolidasan id poliliput pogun id sahau komontirian disio.
Montok ponuridongan linimput pongoput Hospital Papar, kinoburuon dilo’ nokosuang no do 62 pihatus kinopongohon pointonod tinimpuunan monuridong di toun 2017 miampai pinongintoban kos kolimpuunon soginumu’ RM98.5 riong.
“Nokototohuri ilo do okuuri’ ko’ mantad di piniimanan tokou sabab momorikot tooku do 70 pihatus.
“Kinoloidan naantakan sabab no do nokotoguang pandemik Covid-19, tolu toun projik diti amu’ nokoindalan. Nga’, haro nogi’ hal suai i noilaan miagal do koposodiaan pakakaraja’ di kuntiriktor om nogi’ kogogonopan ponuridong.
“Nokito tokou no kinoburuon mantad dilo’, tilombuson tokou popoindalan pibabarasan om kopiantangan id pialatan komontirian miampai Koupisan Karaja’ Agayo, kuntiriktor om pipiro bohogian kikoponsolon mooi do koponginsikap projik diti,” ka disio katalib kotombuluyan projik monginsonong Hospital Papar, di tadau baino’.
Tumanud di Zaliha, wulan Kolimo diti haro koburuon kaawagu soira’ kobolingkahangan kopohompit injin/mekanikal om lotirik asalasai. Projik diti pikikiro opongo dumontol koompokon toun diti om kotimpuun do wulan Kotolu toun tiso’.
“Mantad koponuridongan linimput wagu Hospital Papar diti, kapanahak ilo’ koundaran kumaa lobi 100,000 mogigiyon pososorili’. Ilo’ iso’ habar osonong kumaa mogigiyon Papar,” ka disio.
Projik monginsonong Hospital Papar diti kapaampai ponuridongan wad miampai pomoruhangan 84 katil i kopotonggoi do wad pediatrik, wad koonduan om wad kusai.
Suai ko ilo’, surupukaraja’ i maan posodiao’ kumaa susumakit kaampai no ‘kecemasan’ om ‘trauma’; X-Ray, farmasi satelit, lintuhun pamalantaan nogi’ surupukaraja’ poinggompit.
