Ewon Benedick
KOTA BELUD: TEKUN Nasional pinopoobi’ RM5 riong montok paalasan kumaa mongungusaha’ id siriba’ Skim Koponokodungan Mongungusaha’ Tomu (SPUT).
Pikikiro kiginumu’ 1,000 tulun mongungusaha’ ‘informal’ om ‘mikro’ kaanu koundaran mantad skim diti.
Montiri Kopotundaan Mongungusaha’ om Koperasi (KUSKOP), Datuk Ewon Benedick minoboros, “Skim Koponguhupan Mongungusaha’ Tomu (SPUT) diti nopo nga’ koponguhupan mikro tinimungan montok mongungusaha’ pasar tomu do mongingkawas nindopuan om rontob sosioikonomi tinimungan B40 kosuul no id Sabah om Sarawak.
“Mongungusaha’ id pasar tomu kosudong mongupalai koponguhupan SPUT gisom RM5,000. Skim ponguhupan diti momoguno konsep tinimungan montok poposodia’ kogogonopan koponguhupan di lobi kasanang, osikap om osonong montok kogunaan pongindopuan tumanud di kooturan om kosudongan ponguhupan TEKUN Nasional.”
“Koponguhupan diti poingukab kumaa mongungusaha’ informal. Montok mongupalai SPUT mongungusaha’ informal kaanum onuang foom kopoimaganan pongindopuan miampai amu’ nuru’ popotoguang do foom koporojistoran pongindopuan SSM,” ka disio soira’ rinubaan id Ababayan Kinopoimpuunan SKIM Koponguhupan Mongungusaha’ Tomu (SPUT) di tadau baino’.
Mongungusaha’ id siriba’ SPUT umoligan do Skim Koumoligan Sosiol Pakarajaan Sondiri PERKESO sabaagi pongumoligan insurans kumaa tulun i popoindalan pakarajaan sondiri.
Gisom noondo soginumu’ 57 mongungusaha’ i nakaanu ponguhupan id siriba’ SPUT miampai gatang RM525,000.
Mantad ginumu’ dilo’ 41 tulun kapaampai mongungusaha’ pogun Sabah miampai gatang RM177,000 om 16 tulun mongungusaha’ pogun Sarawak miampai gatang ponguhupan RM75,000.
Soginumu’ do 25 tulun mongungusaha’ SPUT id pososorili’ Kota Belud nakaramit cek ponguhupan i miampai koinsanai dilo’ kigatang RM109,000 id ababayan diti.
Koporintaan Perpaduan do noondo pointopot doid kopoingkawasan kasasanangan id koponuridongan kawagu ikonomi pogun kosuul no Mamasok.
Sokodung ogirot kapamajamin kasasanangan tulun mimpau konsep Malaysia MADANI om mongingkawas rontob koposion rayat potilombus dino koponginsikap om koponigampot kosimbanon sosioikonomi pogun kumaa sumili pogun koburu’ om kinindopuan akawas.
Pointonod noturidong di toun 1998 gisom tulan Koduo 2023, TEKUN Nasional nakapatahak ponguhupan kumaa 548,473 tulun mongungusaha’ miampai gatang RM8.17 bilion id poliliput pogun Malaysia.
TEKUN Nasional tumilombus tumopot id koponguhupan mongungushaa’ informal om mikro id koposodiaan ponguhupan kousinan nogi’ kopotundaan mongungusaha.
