Hajiji Haji Noor
KOTA KINABALU: Boyoon Montiri, Datuk Seri Hajiji Haji Noor minamaramit osonong katatapan i nanu do Barisan Nasional (BN) montok manahak sokodung om tumumboyo’ Koporintaan Perpaduan Sabah buruanon disio.
“Osonong no. Mantad diti kirati Koporintaan Pogun lobi koinggirot, id konsep Koporintaan Perpaduan i tinimpuunan di Luguan Montiri Datuk Seri Anwar Ibrahim,” ka disio soira’ rinubaan katalib pinopoimagon Seminar Popoburu’ Malaysia Madani id Longkod Konvensyen Sompomogunan Sabah (SICC) do hiti di baino’.
Hajiji po nogi’ Ponorikohon Gabungan Rakyat Sabah (GRS) pinokianu mongomi kointalangan i pinalabus di Monunurat Agayo BN, Datuk Seri Dr Zambry Abd Kadir kohondot hal dilo’ tadau minggu’ di nakatalib.
Dr. Zambry minoboros, kinopotontuan dilo’ kopiongoi di katatapan tikid parti id nayatan Pisompuruan i minonuridong Koporintaan Perpaduan.
“Songinan Sekretariat Pointatap Koporintaan Perpaduan Malaysia i tinuridong montok mongulud koinsanai parti i minonuridong dilo’. Iti kaampai no kotontuan Kounsol Lansanon Sektretariat miagal id nayatan pogun kaampai Sabah,” ka disio.
Dr, Zambry minoboros, BN Sabah kitonggungan popogi’iso’ koinsanai inggisaman montok papatantu’ ababayan perpaduan aanu monigampot potilombus dino kapatahak surupukaraja’ bobos osonong kumaa rayat pgoun dilo’ maya’ Koporintaan Perpaduan Sabah.
BN pinapangaran nogi’ di Kumoduo Ponorikohon Tinan Piromuan UMNO Sabah, Datuk Yakub Khan sabaagi mobi’ UMNO om nomungan dilo’ id pirundingan miampai Koporintaan Perpaduan Sabah.
Di ko 6tw Koiso’, BN Sabah pinapahabar minamagayat sokodung om pinopoimagon natagakan kotumbayaan kohondot di Hajiji sabaagi Boyoon Montiri.
Ponorikohon BN Sabah, Datuk Seri Bung Moktar Radin i pinapahabar diti id iso’ kapahabaran media pinotomod minoboros, kootuson dilo’ pinoimagon soira’ pirotian pulitik i nopikogos id pialatan BN miampai parti komponen Perikatan Nasional (PN) talib kinootuson Pomilian Agayo Pogun (PRN) Sabah di katatalib tinohuban di Hajiji.
Iti komoyon haro pisowitan di laang miampai Parti Warisan om Parti Kesejahteraan Demokratik Masyarakat (KDM) montok papaatu’ Koporintaan Pogun buruanon di Hajiji. Laang dilo’ poingkuro po amu’ nokosunsud soira’ limo mantad 17 Puru Lintuhun Koundangan Pogun (ADUN) BN/UMNO Sabah amu’ tuminonggoi om minonilombus sokodung diolo’ kumaa di Hajiji.
Amu’ kinalantaion laang dilo’ sinusuhut di kinopongunggaran Kabinet Pogun Sabah i minanatak di Bung Moktar, Datuk Yakub Khan om Datuk Jafry Arifin. Pogulu dilo’ i Bung Moktar nopo nga Kumoduo Boyoon Montiri I po nogi’ Montiri Karaja’ Agayo, naamot i Yakub nopo Montiri Sains, Tiknologi om Inovasi om i Jafry nopo Montiri Ponombuluyan, Koubasanan om Sandad Posorili’.
Nuhot nung aiso’ kopurimanan sumuli’, ka di Hajiji: “Amu’ sumuli’ … alaa id pulitik diti aiso’ komoyon do pitogodan (dendam), sabab i oponsol nopo nga’ montok koundaran rayat om nogi’ pogun Sabah.
“Ilo’ i oponsol. Ilo’ no tuduan tokou tongo’ lansanon mooi do moningkanan kumaa koponompuruan rayat, pisompuruan om nogi’ kopotundaan pgoun, mooi do ababayan ikonomi tokou koinsarok om rayat kaanu koundaran.
“Iti no tuduan tokou mimburu’ om mimpulitik.”
“Indadon tokou nopo,” ka di Hajiji soira’ nuhot nung haro nunu-nunu pibarasan di nakapanau miampai BN Sabah.
Karait kinoposilihan di Yakub sabaagi mobi’ BN Sabah, ka di Hajiji, aiso’ kobolingkahangan disio do kinoposilihan dilo’.
“Mantad dilo’ montok doho’, poingukab oku id hal ngaawi’ miagal diti sabab angkab ku nopo nga’ montok popoinsanang rayat, popisompuru om nogi’ moningkanan do kopotundaan pogun maya’ palan kopotundaan i nokoimpuun tokou ilo’ nopo nga’ Rikoton Sabah Maju Jaya (SMJ),” ka disio.
