Masidi Manjun
KOTA KINABALU: Montiri Kousinan Sabah, Datuk Seri Masidi Manjun pinoposorou oinsanan koupisan om kotinanan koporintaan mooi do papatantu’ koinsanai karalano’ kapagadangan poindalanon lolobi no id kopoindalanan projik koporintaan.
Minoboros isio, iti mositi’ powonsoiyon montok oinsanan projik, amu’ monimud gatang dilo’, montok papatantu’ tikid Ringgit i pabalanjaon do koporintaan ototopot kapanahak koundaran kumaa rayat miagal di angkabon doid projik dilo’.
“Mimang oku papatantu’ oinsanan ponoriukan om koponimbanan di powonsoiyon pogulu om aktalib kolulusan projik poindalanon miampai poinuhung om tumanud karalano’ nakatantu’.
“Iti montok papatantu’ tikid projik di poluluson do koporintaan otootopot kapanahak koundaran kumaa rayat Sabah om aiso’ kolomogon i pasalaon guno om koporintaan amu’ koimamang do kapangakalan,” ka disio ontok minonorikohon mitingan Akaun Amanah K56 id upis disio doid Menara Kinabalu, do hiti, di tadau baino’.
“Koporintaan do hiti papatantu’ rayat Sabah mamaramit koundaran kopotundaan om koponginsonongan kumaa koposion om ninsorian diolo’, kohondot dilo’ mositi’ tokou toririmo popowonsoi nunu i kohunung, okon ko’ nunu i korohian,” ka disio.
Masidi minoboros, projik mantad oinsanan nayatan om gatang kiguno tompuanon miampai gontob kopinogoton om pomuginawaan di miagal amu’ momuntuk dilo’ do poindalanon kuntiriktor toi komponi pinosongonuan.
Di konihab, Montiri Kousinan dilo’ onotk minonorikohon mitingan ‘pasca’ Kabinet minonuau nogi’ di Monguhup Montiri Kousinan di wagu siliho’, Tan Lee Fatt i tuminaru karaja’ id toguang di Molohingon Pogun, Tun Juhar Mahiruddin di minggu’ nakatalib.
“Unsikohon ku i Tan om otumbayaan oku do tiim tokou oinggirotan po mantad kinohinoon disio poingamung miampai Monguhup Kousinan, Datuk Julita Majungki om i Monunurat Pulitik, Rina Jainal,” ka disio.
