Hajiji Haji Noor
KOTA KINABALU: Sabah momoguno kopogisusuaian id sunduk ‘modal insan’ montok poposindak po do kosunion ikonomi pogun, kopiongoi di Rikoton Sabah Maju Jaya (SMJ), ka di Boyoon Montiri (KM), Dautk Seri Hajiji Haji Noor.
Kohondot dilo’ ka disio, kopotundaan modal insan id Sabah okon i ko’ moningkanan nopo do toisoiso’ kaganaan atantu’ nopo, sabab pogun diti momoguno kabaahan komilaan akawas id kaganaan nogi’ di suai.
Minoboros isio, Koporintaan Pogun manahak koposuulan kohondot do balajaran montok mongimbulai lobi kogumu’ modal insan i kiginoris tumopong, abaal om akawas naangayan id pogun diti.
“Iti kopiongoi di Palan Kopotundaan Rikoton SMJ i hinombo do modal insan wookon onuan koposuulan.
“Mantad tonggungan dilo’, Koporintaan tumilombus monokodung koinsanai inggisaman Komontirian Balajaran Malaysia om Koupisan Balajaran Sabah id kopoingkawasan po do naangayan balajaran nogi’ ababayan poinggompit kopotundaan modal insan id pogun diti,” ka disio id Ababayan Kinopoimaganan Kapamaramaian Tadau Susu Sikul Sompomogunan Zon Borneo 2023 id Longkod Konvensyen Sompomogunan Sabah (SICC), do hiti di tadau baino’.
Teks boboroson dision binasa’ di Monguhup Montiri kumaa Boyoon Montiri, Datuk Abidin Madingkir.
Boyoon Montiri minoboros, hal balajaran om modal insan nogi’ wookon ababayan osuul i pinosotol do Koporintaan Pogun id koposiahan kopotundaan Sabah.
Ka disio, modal insan di awakas om kikosonongon oponsol kopio montok papalantoi mogisusuai katatapan, angkab om ababayan kopotundaan koporintaan potilombus dino kapasarok koburuon pogun kumaa gontob lobi kasawat.
“Koporintaan toririmo opoduli’ kumaa koinsanai susumikul id kopongimbulaian sakag wagu i lobi kagaras, ogirot om lobi kogoris nogi’ papatantu’ diolo’ kaanu koundaran di poinpatut mantad ababayan susu sikul i kapanahak kosonongon lolobi no kumaa tongomulok,” ka di Hajiji.
