Isai pakakaraja’ songkosuayan di komoyon, modidikot aiso’ kasagaan toi, ‘stateless citizen’ toi mongingigit IMM13 – Madius.
KOTA KINABALU: Puru Parlimen Tuaran, Datuk Seri Panglima Wilfred Madius Tangau minomohit ‘data’ (kointalangan) ginumu’ aiso’ karaja’ (panganggur) id Malaysia kosuul no id Sabah i pinoposuang nogi’ pongongguran id nayatan pakakaraja’ songkosuayan doid pinongintoban.
Ka disio, kointalangan i kiguno posuangon apatut nopo nga’ i kapaampai no do mogigiyon nokoiyonon ilo’ nopo nga’ mamasok Malaysia.
“Osuayan oku, nunu kopotutan di nanu montok pinopotonggoi mogigiyon songkosuayan id ‘statistik’ (pinongintoban) kosuul no id Sabah.
“Ilo’ amu’ kopokito koyuon di otopot suai ko’ id timpu miagal kaagal-agal kopokito do koporintaan mangakun kukumaraja’ songkosuayan mitopong do tulun nokoiyonon.
“Iti iso’ i amu’ kohunung om kiguno onuan kopomodulianan pointopot. Montok id Sabah, mokimoilo tokou nogi’, isai pakakaraja’ songkosuayan di komoyon, i potuu modidikot aiso’ kasagaan, ‘stateless citizen’ (mogigiyon aiso’ pomogunan) toi mongingigit IMM13,” ka disio id iso’ kointalangan.
Ka disio, kointalangan rontob pengangguran sapatut do popohompit nopo mogigiyon nokoiyonon om amu’ popotonggoi tulun labus.
“Ilo’ montok papasaga’ mogisusuai inggisaman aanu poindalanon om moningkanan no kumaa di buntukon ilo’ nopo nga’ mamasok Malaysia i kakal aiso’ po nunu-nunu intodonon nindopuan.
“Talib dilo’, nung komilo rontob pengangguran id Sabah pikikiro doti’ do okon ko’ wookon di bobos akawas nung mogigiyon songkosuayan amu’ pinosuang id pinongintoban.
“Sapatut soira’ do amu’ no poingkaraja’, okon toi ko’ apatut yolo’ do pootodon muli’ kumaa pogun nantadon,” ka di Madius pinoposotol.
Id pitimungan Dewan Rakyat doid Kuala Lumpur, Presiden Kehormat Kotinanan Kinabalu Progresif Bersatu (UPKO) dilo’ id pinonguhotan ‘lisan’ minokianu minokianu Montiri Ikonomi pinopointalang ginumu’ penganggur id poliliput pomogunon kosuul no id Sabah.
Minokianu nogi’ isio kopointalangan nung otopot mogigiyon songkosuayan pinosuang id pongintoban dilo’.
Komontirian Ikonomi id sisimbar pinosurat pinopoilo do kointalangan pengangguran id pomogunon diti i pinalabus Koupisan Pongintoban Malaysia maya’ Ruputan Survei Tenaga Buruh Suku Koduo Toun 2023 nopo nga’ 581,400 tulun.
Sabah nokoposurat aiso’ karaja’ soginumu’ 165,600 ilo’ nopo nga’ nokoingkuri’ 4,200 nung piadangon di 188,400 tulun di suku koduo 2022.
Poingkuro po, Komontirian Ikonomi pinopoimagon do Survei Tenaga Buruh i pinoindalan dilo’ kapaampai nogi kointalangan pengangguran id nayatan pakakaraja’ songkosuayan.
