Hajiji minonorikohon mitingan MTPNg di tadau baino’.
KOTA KINABALU: Sabah nopo nga’ wookon di limo pogun id pomorunon diti id haal kinopoindalanan projik om ababayan koburuon,ka di Boyoon Montiri, Datuk Seri Haji Hajiji Haji Noor.
Tumanud ruputan MyProjek, minoboros isio, kiginumu’ 1,271 projik, kopohompit 396 projik pongoputan om 876 projik wagu masaan poindalanon id pogun diti do toun diti.
“Mantad ginumu’ dilo’, 1,171 projik toi kigatang RM5.584 bilion nopo nga’ projik ‘fizikal’, naamot 100 projik suai kigatang RM355.24 riong nopo nga’ projik okon fizikal,” ka disio.
“Pokionuon ku oinsanan bohogian do tumilombus mongingkawas inggisaman montok papatantu’ Sabah kosili pogun bobos osonong id kopoindalanan projik om ababayan koburuon id Malaysia,” ka disio ontok minonorikohon mitingan Kounsol Laang Koburuon Pogun (MTPNg)id Menara Kinabalu di tadau baino’.
Sundung po do naangayan diti kopoondos, i Boyoon Montiri pinoposotol do amu ilo’ apatut silihon padaahan do kalawong om monginrulan waya’ kopiantangan di ababayan toi projik koporintaan.
“Nga’, naangayan diti nuru’ silihon sabaagi potuduk montok dati’ kumaraja’ lobi kogoris id koponginsonongan om manalasai tikid ababayan om projik miampai lobi kosikap, kohunung om oulud, potilombus dino kapanahak koundaran kumaa oinsanan rayat Sabah,” ka disio.
Hajiji minoboros, kopoindalanan ababayan om projik amu’ apatut do poigitan no kumaa kotinanan agayo nopo, tu’ oinsanan kotinanan om komontirian nuru’ papapanau tonggungan di kosudong id kopotontuan kalantaion do kopoindalanan.
Boyoon Montiri nga’ minoboros nogi’ do koporintaan pogun minggisom monginggirot koponguludan kousinan pogun maya’ koponginsonongan karalano’ om puralan koponguludan kousinan.
Iti pinoindalan maya’ pogintongan om minaganu kokiraan di kararalano’ koonuan om koposilihan ‘konsesi’ sabaagi iso’ ralan manalob kobolingkahangan koburuon id Sabah, ka disio.
“Suai dilo’, tikid kotinanan om komontirian nuru’ lobi kasaru’ miontong kapatahakan kopoobian di pinatahak montok papatantu’ dilo’ oguno poinponu’ om kapanahak koundaran kumaa rayat Sabah.
“Pambayaran kumaa kuntiriktor om momorunding nga’ mositi’ powonsoiyon do osikap, kohunung om poinulud mooi do kopoindalanan projik id pogun diti amu’ ohimpogongan toi kotoguang koinloidan,” ka disio.
Boyoon Montiri pinosorou nogi’ puru MTPNg do papatantu’ koinsanai kogugunoon koburuon di kopononsog aanu monoibau osisikap.
Hajiji minoboros, koporintaan pogun nga’ pointotopot nogi’ id kopoindalanan mogisusuai inggisaman id siriba’ Palan Koburuon Sondikoton Sabah Maju Jaya (SMJ) montok popoindalan ababayan kopoingkawasan nindopuan om asil pinalabus id koponoibahan kobolingkahangan komosikinan om mosikin adalaan di kohunung.
“Maya’ inggisaman diti, yati’ okon nopo ko’ kouhup mongingkawas nindopuan, nga nogi’ minggisom monguhup tinimungan tingkananon do lumabus mantad komosikinan.
“Kopusohon dati’ nga’ atalang maya’ inggisaman om karaja’ agaras di po’ompus id kopotontuan tikid ababayan pomogunon toi pogun atanud, oinsonongan om oingkawasan,” ka disio.
Hajiji minoboros, koposodiaan po’ompus kogugunoon om kogogonopan kumaa rayat maya’ koponginsonongan kogogonopan ginumuan, kagaganapan kopio, kogogonopan sosial nogi’ ponguhupan surupukaraja’ sosial nakapanahak koundaran di opilipat kumaa tinimungan mosikin id Sabah.
Suai dilo’, pinointalang disio do ‘teras Modal Insan om Kasasanangan Mogigiyon id palan koburuon SMJ nga moningkanan nogi’ kumaa kopoburuan kosiwatan rayat sabah maya’ balajaran, pingludaan om kasasanangan sosial.
“Iti kaampai inggisaman montok mongingkawas rontob koposion, poposodia’ kosiwatan balajaran om papagaras modan insan miampai poinpuli, suai ko’ monuduk mogigiyon mooi lobi kopoduli’ om orohian do umampai, om asaru’ monguhup toi popotoluod kumaa kopoindalanan tongo’ ababayan i kapanahak koundaran kumaa tinimungan tingkananon miagal tinimungan mosikin om mosikin adalaan diti,” ka disio.
