Hajiji tuminabi’ dilo tulun ginumuan i nokotindapou id Ramai Pamagatangan om Kopongunsikohan doid Lintuhun Sri Sulaman, Tuaran di kosodop.
TUARAN: Boyoon Montiri (KM), Datuk Seri Haji Hajiji Haji Noor om sawo, Datin Seri Hajah Juliah Salag tuminindapou Ramai Pamagatangan om Pongunsikahan doid Lintuhun Sri Sulaman, do hiti di kosodop.
Ababayan dilo’ i mantad di Hajiji pinaanjur sabaagi ponokotanda’ pamagatangan om pongunsikohan kumaa rayat, pakakaraja’ parti nogi’ kukumaraja’ pomorintaan i potitilombus poingudong ogirot monokodung kopomuruanan disio om koporintaan pogun id kopotilombusan koburuon pogun.
Kinorikotan dio Hajiji dii Juliah, sinuau aramai miampai pokikitanan koubasanan, bacaan doa om tayangan boboroson pinotomod i kopokito pason kapamagatangan om tonggungan po’ompus di Boyoon Montiri kumaa rayat Sabah.
Id boboroson disio, minonongkounsikou isio au gigina’ kumaa oinsanan rayat Sabah, pakakaraja’ parti, kukumaraja’ koporintaan om oinsanan bohogian i po’ompus minanahak kotumbayaan om sokodung kumaa koporintaan pogun id inggisaman popoburu’ Sabah miampai poingulud, poinpuli om ogirot.
Pinosotol disio do kaadangon pulitik nogi’ pomorintaan pogun nopo nga’ ponokosudongan (prasyarat) oponsol montok papatantu’ tikid katatapan om inggisaman koburuon aanu popoindalan miampai kiwaya’ montok koponsolon rayat.
Hajiji nga’ pinopolombus nogi’ tinonggungan disio montok tumilombus monginggirot kopoindalanan koporintaan pogun om papatantu’ ababayan koburuon id siriba’ Sondikoton Sabah Maju Jaya (SMJ) 2.0 aanu popoindalan miampai lobi moningkanan, poinpuli om tumanud di kogunoon otopot do rayat.
Kinaramaion ababayan dilo’ sinindak miampai pokikitanan momolihis di nuludan artis nokoiyonon om artis naalap mantad Kuala Lumpur, potilombus dino nokoposili dilo’ sabaagi kosiwatan popironit piromutan id pialatan lansanon om rayat id koyuon di osimbayan nga’ poinponu’ rati.
Wookon artis minomolihis kaampai no i Rozaimie, Marleynnie, Rey Kimara, MJ Abadey, Misha Omar om i Datuk Jamal Abdillah.
