Jamawi (tanga) pinapatahak tandamato kumaa dilo piboi pialaan.
TENOM; Montiri Pomutanaman, Ponginsadaan om Pomorunan Akanon i po nogi’ Puru Lintuhun Undangan Pogun (ADUN) Melalap, Datuk Jamawi Jaafar pinopoimagon Pialaan Sayau Naga om Singa onjuran Koisaan Yung Yee Tenom id Lintuhun Datuk Seri Panglima Antanom, do hiti di konihab.
Jamawi minonongkounsikou kumaa koisaan dilo’ i buruanon di Ponorikohon dilo’, Tay Kok Kiong nogi’ Ponorikohon Mangangajur, Chang Pei Pei mantad kinapagalapan popoimagon ababayan nokomoi.
Jamawi ruminuba om tuminabi dilo songulun piboi pialaan.
Minanangkabayahan nogi’ isio kumaa di 140 piboi mantad 14 koisaan poliliput Sabah i minaganu bohogian id pinialaan dilo’.
Wookon di nakaampai nopo, Tenom, Keningau, Penampang, Kota Kinabalu, Sandakan, Beaufort, Membakut, Inanam om Papar.
Jamawi (tanga’) guminambar pongingitanan katalib pinopoimagon Pialaan Sayau Naga om Singa onjuran Koisaan Yung Yee, Tenom.
“Pialaan nopo diti nga i kumoinduo poonjuro’ katalib walu’ toun di nakatalib.
“Suai dilo’, kapanahak nogi ilo’ kosiwatan kumaa mogigiyon id Tenom do mintong kinomiloon tongo’ mamamain sayau singa mantad pototongkop pogun Sabah,” ka disio.
Jamawi (kotolu, wanan) pinapatahak toluod kumaa di Tay.
Pinopoilo i Jamawi do bohogian disio popoindalan ababayan solinaid tolu tadau kopihondot pamaramaian Toun Wagu Sina mimpuun ko 13 gisom 15tw koduo diti id Maleh Square.
Ka disio, mogisusuai ponuang ababayan di napalan kaampai sulap padagangan, pialaan momowotik om momolukis montok tangaanak nogi kaparagatan suai.
Jamawi (tanga’) guminambar miampai di Denesly (gibang) om ilo suai pogulu nokotimpuun ababayan.
“Alapon ku oinsanan mogigiyon do umampai mamaramai kapamaramaian Toun Wagu Sina Lintuhun Koundangan Pogun (DUN) Melalap do ko 13, 14 om 15tw Koduo diti,” ka disio.
Nokotindapou nogi’ i Lansanon Koburuon Mogigiyon (PPM) DUN Melalap, Denesly Justin om pipiro po kapitan Cina.
