KOTA KINABALU: Montiri Balajaran, Sains, Tiknologi om Inovasi, Datuk James Ratib minoboros, koporintaan pogun minggisom maganu kolulusan montok koinsanai 45,000 upalai komputer riba (laptop) i potoguangon kumaa Suruhanjaya Piromutan om Multimedia Malaysia (MCMC) montok kogunaan sikul ngaawi’ id pototogkop pogun diti.
Minoboros isio, inggisaman dilo’ kopohompit nayatan prasikul, sikul osiriba’ om sikul lintanga’, miampai laptop poiyonon id sikul nogi’ gunoon miampai kilongkod maya’ kogogonopan miagal pisuk ‘sumber’ montok papatantu’ pomogunaan di kiwaya’ om aadas.
“MCMC nga’ mangaba’ nogi’ do ‘papan pintar’ (smart board) montok monokodung pinsingilaan digital id suang pisuk daraja,” kad isio soira’ rinubaan media katalib minonorikohon Mitingan Ponguludan Karaja Ponguhupan Komputer Riba, Starlink om Panel Solar montok Sikul Osiriba om Lintanga’ id Pogun Sabah, do hiti di tadau baino’.
I James pinopoilo do Sabah kiharo kikiro 1,300 tinan sikul, om sondikoton timpu anaru komontirian nopo nga’ montok momogonop pisuk daraja do papan pintar miampai mogisuhut-suhut nogi papatantu’ tongo’ mongingia’ oonuan pingludaan id karalano’ ponudukan digital.
Suai dilo’, ka disio, MCMC poposodia’ kopooputan internet Starlink kumaa 68 tinan sikul i kakal aiso’ romut internet, suai ko’ mangaba’ sistem ginoris solar kumaa sikul ngaawi’ i aiso’ pangaba’ lotirik.
“Manu tokou papatantu’ Sabah amu’ oiduanan osodu’ id sunduk koburuon tiknologi, kaampai tiknologi wagu miagal komilaan winonsoi (AI), nung pitopongon di pogun ngaawi’ id Semenanjung Malaysia om Sarawak,” ka disio.
Minoboros isio, Koupisan Balajaran Pogun Sabah mongulud om monginsonong asil pinibabarasan pogulu iso’ kopongupalaian pinotomod potoguangon kumaa Montiri MCMC montok ponimbangan om kolulusan.
Minongomi ginumu’ laptop di upalaion, pinointalang di James do upalai soginumu’ 45,000 unit nopo dilo’ nga’ tumanud di kogunaan i nointutunan do Koupisan Balajaran Pogun Sabah om tumanud di kolulusan MCMC.
Ka disio kawagu, gisom noondo diti pongiikiraan kos koinsanai kakal amu’ po nokoimagon, nga’ minongomi inggisaman dilo’ sabaagi iso’ kouhupan agayo MCMC kumaa koburuon siktor balajaran id Sabah.
Kohondot pamanahan susumikul kumaa Semenanjung Malaysia montok mongoput pinsingilaan, ka di James, Dana Balajaran Pogun Sabah maan tilombuso’ monguhup susumikul di kosudong, naamot atag diskaun tambang pontuludan miampai komponi pontuludan do noondo diti mamaso pibabarasan di tongo’ kotinanan poinhompit.
