Hajiji (poindikau kohopod, wanan) miampai naalap suai guminambar miampai Lansanon Koburuon Mogigiyon (PPM) katalib ababayan tuminaru om suminain Aku Janji karaja’id Menara Kinabalu, di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor minongunsub oinsanan bohogian, kosuul no Lansanon Koburuon Mogigiyon (PPM), montok monguhup koporintaan popointalang naangayan dau kumaa rayat id kinoiyonon sompoopori.
Minoboros isio, ogumu’ naangayan koporintaan Gabungan Rakyat Sabah (GRS) id siriba’ pomuruanan disio amu’ nakahabar do pointongkop, nokoowit do rayat amu’ songkuro nokoilo kinoburuon otopot di nokoindalan.
“Amu’ kinalantaion papatayad kointalangan miampai poinpuli nokoowit kobolingkahangan miagal pangaba’ waig om lotirik nogi’ ralan naraat okito lobi kotigulai id media sosial, sundung pia koporintaan GRS masaan monoibau tongo’ kobolingkahangan diti.
“PPM aanu komoyon ponokomato om tolingo koporintaan. Karaja’ agayo dokoyu nopo muhup popointalang katatapan, ababayan om kinalantaion koporintaan kumaa rayat. Potonuon naangayan koporintaan tu’ ogumu’ kinalantaion di pinorikot kumaa rayat.
“Maya’ palan koburuon Sondikoton Sabah Maju Jaya (SMJ), nakapasarok tokou kawagu do ikonomi Sabah katalib Covid-19, minongingkawas asil pogun manad RM4 bilion kuminaa RM7 bilion om rizab pogun noondo nakatalib RM8.6 bilion.
“Ingkaa nogi’ i kopoopuan. Maan poiradan, Taman Pomorunan Tumau om Gas Sipitang (SOGIP) noondo noponu’, om di kaawagu diti songulun papaapu’ mantad Singapura pinapaapu’ RM31 bilion do hilo’i pikikiro kopongimbulai 6,000 gisom 7,000 kosiwatan karaja,” ka disio id Ababayan Tuminaru om Suminain Aku Janji PPM wagu id Menara Kinabalu do hiti di tadau baino’.
Ka di Hajiji, nung koporintaan GRS komoyon do amu’ nakalantoi, SOGIP om tongo’ taman pomorunan suai id Sabah pikikiro doti’ do kakal aiso’ suang mantad no do aiso’mangangapu’.
Minanangkabayahan kumaa PPM di wagu tuminaru, kalansanan disio yolo’ do kaanu monguhup koporintaan miampai aparagat id kapatahakan kointalangan di otopot kumaa rayat om nogi’ popointalang miampai kiwaya’ ababayan om naangayan katatapan koporintaan.
“Manu oku oinsanan PPM popoindalan karaja’ miampai poinponu’ tinonggungan montok timpu dumontol Sabah om sinakagon obontol,” ka disio.
Hajiji pinoposotol nogi’ do tonggungan PPM nopo nga’ iso’ tonggungan agayo i mositi’ poindalanon miampai kitinonggungan sabaagi sunsuyon pialatan koporintaan om rayat id nayatan siriba’.
Daamot dilo’, i Boyoon Montiri minoboros, koporintaan pogun monginggirot kopoindalanan Palan Koburuon SMJ 2.0 i pinatantu’ poimpuunon koompokon wulan diti montok papagaras ababayan ikonomi, infrastruktur om kotundunan rayat id pototongkop pogun.
Minoboros isio, kopoindalanan Palan Koburuon SMJ do koporintaan GRS pointonod 2021 nokopo’iliu nimpohon koburuon di ogirot om kapanahak koundaran kumaa rayat id mogisuaian siktor.
Suai ko’ id ikonomi, ka di Hajiji, koporintaan tumilombus moningkanan kumaa koburuon ‘modal insan’, kasasanangan rayat om nogi’ koponginsonongan infrastruktur miagal pangaba’ waig om piromutan ralan maya’ palan ‘strategik’ id siriba’ SMJ 2.0.
Pinosotol disio kobolingkahangan kopohompit pamansaian om ponginsonongan infrastruktur id siriba’ tonggungan koporintaan Pisompuruan tilombuson ulingadon kumaa bohogian kikuasa’ Pisompuruan montok koponsolon rayat Sabah.
Kiginumu’45 PPM tuminaru karaja’ om suminain surat Aku Janji.
