KUNDASANG: Koporintaan pogun Sabah maya’ Kuonsol Koumoligan Talun-alun (MKJR) Sabah om Komontirian Karaja Agayo om Utiliti (KKRU) poingkakal moningkanan kopoindalanan kimpin koumoligan talun-alun do po’ompus montok mamajamin kasasanangan om koumoligan rayat.
Kumoduo Boyoon Montiri I po nogi’ Montiri Karaja Agayo om Utiliti, Datuk Seri Dr. Joachim Gunsalam minoboros, koumoligan talun-alun nopo nga’ tonggungan oinsanan i momoguno piuhupan oinsanan bohogian, kosuul no moomoguno talun-alun.
“Tikid tulun papapanau tonggungan oponsol id kopotontuan koumoligan tinan sondiri om nogi’ moomougno talun-alun di suai,” ka disio kumaa media id Ababayan Kimpin Kopurimanan Koumoligan Talun-alun Kopihondot Tadau Natal 2025, do hiti, di tadau baino’.
Ka disio, kimpin dilo’ kituduan mongingkawas kopurimanan, monimban pogoyuon moomoguno talun-alun nogi’ mongingkuri’ kaantakan koumoligan, kosinduolan om katagakon niawa.
Suai ko’ kapatahakan pason kopurimanan, ka disio, kimpin diti poposotol nogi’ laang pongilagan ‘praktikal’ maya’ kopoikidan babarang koumoligan miagal ‘segi tiga kecemasan’ om ‘kit pertolongan cemas’ kumaa moomoguno talun-alun.
Pinoposorou nogi isio moomoguno mooi do papamanau miampai monidsorou, mananud rontob siniau, mongilag pomogunaan telipon piowit-owit soira’ papapamanau nogi’ papatantu’ padsakaian id koyuon di osonong pogulu monimpuun pamanahan.
Kimpin toun-toun onjuran MKJR Sabah diti pinoindalan miampai pointatap tikid timpu kararamaian nosusuhut kinoingkawason trafik, miampai watas Ranau pinili sabaagi koiyonon tu’ i po nogi wawaya’an agayo i koporomut Tisan Kotonobon om Tisan Kosilahon Sabah.
