Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor pinoposotol kawagu tonggungan ogirot koporintaan pogun montok momogompi’ pisompuruan rayat nogi’ monilombus kaadangon pulitik.
“Pisompuruan di ogirot id nayatan rayat om kaadangon pulitik nosili impohon kumaa komogoton ikonomi pogun nogi’ kosunion kopoopuan,” ka disio id pason Krismas 2025.
Boyoon Montiri nga minongunsub nogi’ oinsanan bohogian montok poposindak sunduan Krismas i mantad no do polisihan om kopuawangon ginawo nogi’ pinoposotol kawagu tonggungan kumaa pogitimbangan, pogipantangan om pisompuruan.
Minoboros isio do Krismas, sabaagi kaparamaian oponsol mogigiyon Kristian, miampai kinoubasanan dilo’ popisompuru paganakan om koombolutan.
Pinosotol nogi’ disio poingkuro, id kopogisusuaian ugama’, tinaru om tungkusan koubasanna Sabah, Krismas nakapanahak kosiwatan kumaa oinsanan do misompuru, moginggirot piromutan om posunui piouludan pogialatan tinaru.
Pinopolombus pason Krismas kumaa oinsanan tulun Kristian, ka disio’ “Kalansanan karamaian diti kopomonu’ walai dokoyu om mogigiyon tokou do kounsikahan, kotoronongon om piuludan.”
