Jamawi (poindikau, Tanga) guminambar pongingitanan miampai oinsanan i nokotindapou id ramai Pamaramaian Tadau Krismas MAFFI 2025.
KOTA KINABALU: Montiri Pomutanaman, Ponginsadaan om Pomorunan Akanon Sabah, Datuk Jamawi Jaafar lumansan mooi do sunduan piombolutan id nayatan puru Komontirian Pomutanaman, Ponginsadaan om Pomorunan Akanon (MAFFI) kotilombuson inggiratan dumontol toun 2026.
Ka disio, koyuon karaja di sopisokodung, poingukab montok pibabarasan om toririmo poinsodia’ monguhup tiso’ om tiso’ nuru’ tilombuson montok papatantu’ koinsanai plan nogi’ ababayan Komontirian aanu popoindalan miampai lobi kiwaya’ om kiginawo.
Ka disio, mimpau piombolutan ogirot kosili posunduran kumaa kopoindalanan katatapan om ababayan Komontirian miampai lobi oulud, potilombus dino monginggirot kotumbayaan nogi’ piuhupan id kotinanan.
Jamawi minoboros dilo ontok Pamaramaian Krismas MAFFi Toun 2025 ki’uhu ‘Strengthen Friendship’ i pinaanjur do Komontirian disio di konihab.
Jamawi tinanud sawo disio, Datin Zainatunnisa Ibrahim miinooi intong sinusulap pokikitanan om guminambar miampai oinsanan sitaf koupisan om kotinanan MAFFI.
Minonongkounsikou nogi’ isio kumaa koinsanai puru Komontirian nogi’ kotinanan id siriba’ MAFFI i nokotindapou, om minongomi kapamaramaian osuau di naramit disio koposudu’ kopio.
Minoboros isio, ramai dilo nga ii kumoinsan naampai disio om paganakan agayo Komontirian pointonod sinili sabaagi Montiri Pomutanaman, Ponginsadaan om Pomorunan
Minonongkounsikou nogi’ isio kumaa puruankuasa manganganjur binuruan do Koupisan Veterinary Sabah mantad ninggisaman diolo’ pinapalantoi ramai dilo i noponu’ do wotik om koounsikahan.
Jamawi om sawo, Datin Zainatunnisa Ibrahim guminambar pongingitanan miampai koinsanai sitaf koupisan om kotinanan MAFFI.
Minongomi kotilombus uhu kapamaramaian toun diti, ka disio, Strengthen Friendship kohunung kopio di koyuyuon om i gunoon do MAFFI do timpu diti.
Ka disio, piombolutan okon ko’ piromutan sondiri, nga nosili impohon kumaa kotumbayaan, piuhupan om korotian id sosonginan kotinanan di agayo om mogisusuai miagal MAFFI.
Pinosotol disio do soira’ piromutan sompipi puru karaja’ ogirot, piromutan kosili lobi koturundus, kopoindalanan karaja’ lobi kasanang om koinsanai kaantaban aanu monoguang oinsanan do poinsukod nogi’ poingukab ginawo.
Pinoposorou nogi’ i Jamawi mooi do koupisan, kotinanan om koinsanai pakakaraja’ MAFFI do amu’ monokisolod tiso’ om tiso’ nga sopigonop-gonop sompipi’ diolo’.
Pointonod miniuhup miampai puru komontirian, ka di Jamawi, nokito disio sondiri poingkuro kotinanan ngaawi id siriba’ MAFFI gumura sabaagi iso tiim di oulud om sopigonop.
Pinaagal disio piuhupan dilo’ miagal songinan misin i tinamangan miampai osonong, hinombo tikid komponen karati tonggungan sompoopori om gumura’ kumaa sondikoton di miagal.
Ka disio, koyuon dilo’ okon ko’ asanang do monigampot om aantakan no soira’ haro kopurimanan mamantang, kotumbayaan om nogi’ piombolutan di ouli’ id nayatan puru karaja’.
Ka di Jamawi, pamaramaian Krismas koowit rati pointongkop kokomoi kolisihan, pomoromitan om kopogiagalan di osomok kopio do mogigiyon Sabah i opuawang do kopogisusuaian koubasanan om kotumbayaan.
Ka disio kawagu, ramai miagal dilo’ okon ko’ kararamaian nopo tomod, nga kosili liwang montok puru komontirian sopiintutun-tutun miampai lobi kosomok, monginggirot piromutan nogi mamantang pisuayan sabaagi iso ginoris oinsanan.
Jamawi om sawo, Datin Zainatunnisa Ibrahim guminambar pongingitanan miampai koinsanai sitaf koupisan om kotinanan MAFFI.
Minamason isio Kounsikahan Tadau Krismas kumaa oinsanan puru komontirian om paganakan diolo’, miampai lumansan karamaian dilo koowit kounsikahan, kotoronongon om nogi’ kahandaman oomis miampai diolo’ i koupusan.
Minaganu nogi’ isio kosiwatan minamason Kotobian Mamaramit Toun Wagu 2026 om lumansan toun obontol kotilombus koponginggirot piombolutan nogi’ mogowit lobi kogumu’ kalantaion kumaa MAFFI.
Nokotindapou nogi’ i Monguhup Montiri, Datuk Hendrus Anding; Monunurat Pointatap Komontirian, Datuk Leonard Stephen Poyong; sawo di Jamawi, Datin Zainatunissa Ibrahim; Potunud Surupukaraja’ Veterinary Sabah po nogi’ Ponorikohon Manganganjur Ramai Krismas Nayatan Komontirian Toun 2025, tongo’ Kumoduo Monunurat om pipiro po luguan koupisan nogi’ kotinanan.
