Dr. Joachim miampai Presiden PBS Datuk Seri Dr. Maximus Ongkili, tongo’ lansanon om puru mongongobi’.
PENAMPANG: Parti Bersatu Sabah (PBS) pinoposotol tonggungan dau montok tumilombus sumili kuasa’ popiadang di kiwaya’ id pulitik pogun, sundung pia potoguang kaantaban pulitik di apagon.
Ponowoli Presiden PBS, Datuk Seri Dr. Joachim Gunsalam minoboros, parti dilo’ okon nopo ko’ napasi solinaid 40 toun, nga kotilombus apanggor id kopoburuan montok rayat Sabah om kopotutan pogun maya’ ponginsomokan kiprinsip om ogirot.
Pinoposorou isio puru do PBS nakawaya’ mogisusuai kaantaban kaampai siam Pomilian Agayo Pogun (PRN), lobi 15 Pomilian Agayo Umum, pinialanan koporintaan om kaantakan tuminindak parti i nokoumbal minogumbal kotumbayaan rayat kumaa sistem pulitik Sabah.
“PBS pointatap poungkakat; noumbalan, nasahap, komoyon do ogundop; nga’ pointatap miampai rayat Sabah,” ka di Dr. Joachim id Kongres PBS ko-40 do hiti di tadau baino.
Pinosotol disio naangayan parti id PRN 2025, miampai nakalantoi turu’ mantad di 14 timpohon i ningkakat, okon ko’ naantakan toomod nga mantad no kotumbayaan rayat kumaa kopoburuan po’ompus PBS montok pogun.
Minonongkounsikou nogi isio kumaa koinsanai calon om pakakaraja parti, pinoposotol do kinalaan okon ko’ koompokon nga’ kosiwatan montok monginsonong tinan om monginggirot do parti.
Dr. Joachim pinoposorou puru do popoiliu kotiu’on kumaa parti katalib ko’ mantad koponsolon kousinan, tu’ PBS winonsoi mantad prinsip om kopoburuon po’ompus pointonod pinonuridongan dilo’ di 1985.
“Kotiu’on kumaa parti kirati momusorou tokou do oinsanan, kumaraja’ miampai disiplin, om momonsoi kootusan di mongobi’ kumaa timpu dumontol parti om rayat Sabah, okon i ko’ montok koponsolon tinan sondiri,” ka disio.
Dr. Joachim pinoposotol do kootusan parti montok tuminimporon id Gabungan Rakyat Sabah (GRS) pogulu PRN 2025 nopo nga’ kohunung, mimpau di data pomilian agayo om pinonorisidan naangayan pogun, okon ko’ kopurimanan nopo tomod.
Ka disio, kootusan tuminimporon id GRS kapatantu’ PBS kosudong, kiampawong om kaanu popoburu’ kopotutan rayat Sabah miampai lobi kiwaya’ id koporintaan pogun.
Dr. Joachim nga’ pinosotol do piuhupan PBS id GRS nokouhup kumaa kaadangon pulitik om ikonomi Sabah, kaampai kinoinsawaton rizab pogun mantad RM3.5 bilion di 2020 kuminaa RM8.3 bilion di 2025, nogi’ nindopuan pogun nakatalib RM7 bilion.
Pinosotol nogi disio PBS poinggirot popoburu’ kopotutan Sabah maya’ Pibatosan Malaysia 1963 (MA63), miampai kinalantaion koporintaan pogun minonigampot 13 mantad 29 sugaton MA63, kaampai kuasa ponombuluyan, ponguludan balajaran om kuasa panamangan ginoris om waig.
Dr. Joachim minoboros, ponugatan 40 pihatus asil oburisi Sabah masaan pohimogogon om pikikiro kouhup pialatan RM1.5 bilion gisom RM2.2 bilion sontou, i kaanu posiau koburuon kogogonopan pogun.
Pinosotol disio do PBS amu’ osontob ginawo di kapahabaran nopo tomod nga papatantu’ tikid ‘klausa’ MA63 koindalan om kopotutan Sabah pogulion maya’ kapapanahan di pohimagon om kiwaya’.
Id inggisaman monginggirot parti, Dr. Joachim pinopoloting sondikoton PBS kaampai mongingkanan kopomodulianan kumaa koburuon komulakan maya’ PBS Youth Leadership Academy om ababayan ‘mentor-mentee’ id tikid zon.
PBS nga monginggirot nogi’ kosompuruan om naangayan bohogian parti, papatantu’ tikid bohogian aparagat om kouhup ginoris nogi’ sokodung kosudong montok kalantaion parti dilo’ do timpu obontol.
Dr. Joachim pinoposotol do parti monilombus prinsip mogisusuai tinaru, monginggirot sokodung id mogigiyon KDM, Pribumi Sabah, Muslimo om mogigiyon Sina’, nogi’ popohompit tinimungan abaal maya’ PBS Professinals Network.
Minokianu nogi’ isio do balajaran pulitik nayatan siriba’ tilombuson, kaampai manalob pulitik tusin om monuridong sakag mongungundi komulakan di haro prinsip om kibantug.
Dr. Joachim pinoposotol do Kongres ko-40 nopo nga’ titik impuunon kumaa fasa kotungagan PBS, montok monginggirot pisompuruan saalom, disiplin pulitik, om monuridong kopomuruanan wagu kitonggungan montok timpu dumontol Sabah.
“Kanou tokou no lumaang kumaa toguang toinsanan, montok songinan Sabah di lobi aadang, lobi kotunda’, om lobi kibantug. PBS – Otoboi, Otiu’, om Misompuru montok Sabah,” ka disio.
