Jamawi (poindikau), Alexander (tohuri kotolu, gibang) om i Sabdil (gibang) guminambar miampai koinsanai mamaramit BMT.
TENOM: Komontirian Pomutanaman, Ponginsadaan om Pomorunan Akanon (MAFFI) minonuhu’ Kotinanan Pomorunan Gata’ Sabah (LIGS) do tumilombus mongingkawas kopulokison nogi’ waya’ kapatahakan surupukaraja’ kumaa momukabun okoro’ gata’ montok papatantu’ mogigiyon dilo’ kaanu tumonggoi id kopomoromitan komogoton pogun om pomogunon.
Montiri dilo’, Datuk Jamawi Jaafar minoboros, ponginsonongan po’ompus do LIGS oponsol kopio mooi do ponguhupan om sokodung koporintaan aanu momoguno miampai poinbobos di momumukabun okoro’, kosuul no id watas labus kakadayan.
Minoboros isio dilo’ ontok pinopoimagon Ramai Kinapatahakan Ponguhupan Timpu Gumompus (BMT) kumaa momumukabun okoro’ gata’ Watas Tenom id Lintuhun Datuk Seri Panglima Antanom, do hiti, di baino’.
Jamawi (wanan) ruminuba’ mogigiyon kampung i nokotindapou id ababayan dilo’.
Kohondot dilo’, Jamawi po nogi’ ADUN Melalap pinoposotol nogi tonggungan komontirian disio do papatantu’ koinsanai palan di pinoloting aanu popoindalan miampai kiwaya’, okon nopo ko’ montok mogigiyon DUN Melalap, nga nogi’ koinsanai rayat Sabah.
Daamot dilo’, pinopoilo isio do MAFFI popoindalan tolu inggisaman agayo mimpuun toun tiso’ montok monginggirot kojominan akanon nogi’ mongingkawas nindopuan rayat i kohompit id siktor pomutanaman om pomorunan akanon.
Inggisaman kumoiso nopo nga’ papagaras Ababayan Kebun Dapur i pikikiro kaanu mongingkawas asil pomutanaman suang walai nogi’ mongunsub kogompitan mogigiyon mantad mogisusuai nayatan id siktor dilo’.
Ka disio, ababayan kikonsep kopolobusan tanom, ponginsadaan om pomutayaman kiturukan okoro’ dilo’ poindalanon tumanud kosudongan kinoiyonon nogi kogoosan suang walai, potilombus dino kapasaga’ rayat kaanu intodonon akanon kaampai protein miampai lobi minpoopori.
“Ponginsomokan diti okon nopo ko’ kouhup mongingkuri’ kos balanja masi, nga’ koponokodung inggisaman papatantu’ koumoligan om kotilombuson pangaba’ takanon,” ka disio.
Jamawi (tanga’), Riduan (kaapat, wanan) guminambar pongingitanan miampai dilo momumukabun okoro’ gata’ i minamaramit BMT om tombului di nokotindapou.
Inggisaman koduo nopo nga’ kopohompit kopoindalanan Ababayan Mentor_Mentee Pomutanaman sabaagi posunduran mangahak sukod wagu do umampai miampai pointopot id kaganaan pomutanaman.
Ka di Jamawi, ababayan dilo’ mongintutun sukod wagu di aparagat id siktor pomutanaman do maan ahako’ miampai kiralan, kopiongoi di inggisaman kapagarasan rayat om kopongiggirotan kojominan akanon pogun.
Inggisaman kotolu nopo nga’ pongunsuban Ikonomi Digital id nayatan mongindapu’ pomorunan takanon montok popoinggayo pidagangan nogi’ mongingkawas nindopuan mongingindapu’.
Minoboros isio, kopiongoi di kinoburuon ikonomi digital, pomogunaan platform id piromutan kotumbayaan kouhup mongungusaha akanon do papadagang asil miampai lobi poinpuli, suai ko’ kopongukab kosiwatan kumaa sukod wagu kikosiwatan id kaganaan pamansaian takanon maganu nindopuan di atatap.
“Kototolu inggisaman diti timpuunan popoindalan do toun tiso om otumbayaan oku kaanu manahak waya’ osonong kumaa kasasanangan rayat nogi’ koburuon siktor pomutanaman om pomorunan akanon pogun,” ka disio.
Jamawi id boboroson disio pinopoilo do mimpau di kopokionuan mantad tongo’ momumutung gata’, iso’ karatas karaja’ wonsoiyon do LIGS miampai komontirian montok atag popoingkawas subsidi Ponguhupan Koporintaan Pogun (BKN) id Mitingan Kabinet do obontol.
Soginumu’ 9,000 momumutung gata poinrojistor id siriba LIGS om id ababayan di miagal, soginumu’ 150 nakaramit BMT i pinotunui di Jamawi.
Jamawi minonongkounsikou nogi kumaa puruankuasa manganganjur om oinsanan boogian nokohompit id kinopoonjuran ababayan kinapatahakan BTM kumaa momumubakun okoro gata id watas dilo’.
Nokotindapou nogi’ Puru Parlimen Tenom, Riduan Rubin; Upisor Watas Tenom, Alexander Liew; Monijor Karaja LIGS, Sabdil Tanjong; mobi’ kumaa Monunurat Pointatap MAFFI, Daphne Gauzim; Monguhup Upisor Watas Tenom, Zakaria Jamal om mobi’ kumaa di Luguan Puils Watas Tenom, ASP Ahmad Razali.
Nokopogulu, i Jamawi minooi tombului doid SK Melalap om ruminuba’ di tongo’ mongingia’ om molohing do hilo’ id Ramai Kinopoimaganan Apresiasi om Graduasi sikul.
